GOIZ PASA ZORAGARRIA MENDILAGUNEKIN

Eguraldi ederra lagun genuela goiz pasa zoragarria egin genuen mendilagunok pasa den larunbatean.

Iurretatik abiatu ginen. Garaiko bidea hartu, eta berehala hasi ginen txamarra eta jertseak kentzen. Huntza taldearen abesti famatuak dioen lez, "aldapan gora pausorik pauso". Lehenengo geldialdia San Juan baselizan egin genuen. Ermitaren ondoan IX. eta X. mendeetako hilobiak daude. Berbalagun batzuek bazekiten garai horietako historia apur bat, eta badirudi erromatarrak ere ez zirela urrun ibili.

Fruta pixka bat jan eta ekin genion berriz ibiltzeari. Mendi bideak alde batera utzi, eta laster heldu ginen Garaira eramango gintuen errepidera. Bat-batean, gure aurrean agertu zen Garai herria. Zeru urdina goian, eta Garai herria zelai berdez inguratuta behean.

Ez ginen denbora luzez Garain geratu. Tabernan tragotxo bat hartzeko gogoa izan genuen, baina gogoei eutsi, eta Gerediagarako bideari ekin genion. Bidean, ibai ertzean, antzinako errota batekin egin genuen topo. Errotaren ondoan zaharberritze prozesuan zegoen baserri bat ikusi genuen, ederra benetan. Eta izkina batetik non agertu zitzaigun Xeberri. Baserria beste garai batean papergintza enpresa omen zen. Adi-adi entzun genituen bere istorioak, eta gehiegi luzatu baino lehen, berriz jarri ginen martxan, eta berehala, presa eder batekin egin genuen topo.

Berbalagunen aterkipean jarraitu genuen bidea. Berba eta berba, konturatu orduko Gerediagara heldu ginen. Toki hura oso garrantzitsua omen zen erdi aroan, izan ere Durangoko Merinaldeko jaun eta andreak bertan batzen ziren.  Gu ere ez ginela gutxiago izango, eta hantxe jarri ginen eskualdeko jaun eta andre bezala.

Ibilbidea zirkularra zenez, Iurretara heltzea baino ez zitzaigun falta. Baina horrelako egun bat ezin bukatu topa egin gabe. Bakoitzak bere bidea hartu baino lehen, eguna ondo bukatzeko topa egin genuen, eta hurrengora arte batekin agurtu ginen.

Eskerrik asko eta zorionak parte hartu zenuten guztioi. Datorren urterako beste plan mordoxka daukagu gordeta.

Durangaldeko altxorretako batzuk ezagutzeko ibilbidea

Berbalagun!

Badator berriz Mendilagun. Aurrekoan bertan behera utzi behar izan genuen eguraldi txarragatik. Baina oraingoan eguraldi aurreikuspenak gure alde daude, eta neguko eguzki ederra izango dugu larunbatean.

Mendi-buelta berezia. Eskualdeko bost herritatik igaroko gara: Iurreta, Garai, Berriz, Matiena (Abadiño) eta Durango. Durangaldeko altxorrak ezagutzeko aukera paregabea.

Abenduaren 14an, goizeko 10:00etan Iurretako eliza ondoko aparkalekutik abiatuko gara. Hiru ordu inguruko ibilbidean gure ingurua ezagutzeaz gain, elkar ezagutzeko aukera izango dugu.

Gogoratu izena eman behar dela. Deitu edo idatzi whatsappa telefono honetara: 639 400 786

 

MINTZODROMO eguna aldatu dugu

ADI!

Arazo teknikoak direla eta Mintzodromo eguna aldatu behar izan dugu; abenduaren 2an izango da.

Goizeko saioa 10:00etatik 12:00etara izango da. Hiru gairen inguruan goxo arituko gara, edari bero eta pasta batzuekin.
Eta arratsaldea 17:30etik 19:00etara izango da saioa. Ondoren, Euskararen egunaren bezpera ondo bukatzeko plan ezin hobea izango dugu: Mikel Martinezen "Tabernaria" ikuskizuna eta luntxa.

Parkatu data aldaketekin mareatzearren.
Zatoz euskaltzaleon topaketara!
Animatu eta eman izena!

MENDILAGUN IRTEERAK

Kaixo, Berbalagun!

Astetxo batzuk pasa dira Mendilagun taldea aurkeztu genuenetik. Zaletasun anitzeko Berbalagunok gaude Durangaldean. Paraje zoragarriz inguratuta gaude, eta horregatik, agian, hainbestek daukagu mendizaletasuna. 

Euskara kalera ateratzea da Berbalagunen helburua. Baina haratzago heldu nahi dugu: inguruko mendi eta txoko ezkutuak euskaraz busti nahi ditugu.

Adi, Berbalagun. Aurki itzazu zapatilak eta euriari aurre egiteko txamarra egokia. NEGUAK EZ GAITU BELDURTZEN!

Hona hemen hurrengo hilabeteetarako mendilagunen proposamena.

Gogoratu aurretiaz izena eman behar dela. Deitu edo idatzi whatsappa zenbaki honetara: 639 400 786

Durangaldeko MINTZODROMOA

Kaixo, euskaltzale!

Badator Durangaldeko VI. mintzodromoa. Beste urte batez euskaltzaleon topaketa ospatuko dugu Plateruena kafe antzokian azaroaren 28an.

Gure eskualdeko herrietako kaleetan euskaren presentzia handitu nahi dugu. Horretan dihardugu ehundik gora Berbalagunek.

Euskara ikasle, irakasle, euskaldun zahar eta berri, gazte eta zahar elkartuko gara Mintzodromoan.

Euskara praktikatu nahi duzu?Euskara praktikatu nahi duenari lagundu nahi diozu?
Durangaldeko euskaldunen sarea indartu nahi duzu?
Euskaraz eta lagun giroan momentu atsegina igaro nahi duzu?

Hauxe da zure aukera. PARTE HARTU MINTZODROMOAN. 

Eman izena Durangaldeko euskaltegietan edo telefono bidez: 639 400 786

MENDILAGUN eta IRAKURZALE KLUBAK

Kaixo,

Berbalaguneko ikasturte berria martxan dago, eta Durangaldeko Berbalagun taldeek berriz ekin diozue astero elkartzeko dinamikari. Talde guztietatik pasatzeko ahalegina egin dugu, eta urteetan eraikitako Berbalagun sarea gertuagotik zaindu eta ezagutu nahi dugu.Zaletasunen inguruan ere galdetu dizuegu, eta proposamen pare bat jaso ditugu:

MENDILAGUN eta IRAKURZALE KLUBA.

Berbalagun izan edo ez izan, zaletasun hori baduzu eta euskaraz gozatu nahi baduzu, jarri gurekin harremanetan. 

Durangaldeko Berbalagun berriro martxan

 2019-2020 IKASTURTEA ABIAN DA

Durangaldeko Berbalagun berriro martxan da. Gaurtik aurrera taldeak eratzen hasiko gara Durangaldean zehar euskaraz aritzeko. Gogoan izan gure egitasmoa doakoa dela, debalde, dohainik. Ez duzue aitzakiarik, beraz. Konpromiso bakarra da ordu bete astean eta ikasturte bat egotea, ez dugu besterik eskatzen. Kartelean berbalagun batzuk agertzen dira, mota guztietako jende jatorra dugu. Ez galdu.
IZENA EMATEKO, klikatu HEMEN.

BOLO TXAPELKETA ETA IKASTURTE BUKAERAKO JAIA

Giro ezin hobean ospatu genuen ikasturte bukaera. Berbalagun mordoa biltzeaz gain hainbat herritar ere hurbildu ziren atzo Berrizera. Bolo txapelketa bizia izan genuen. Denok ere gogotsu, baina azkenean, Beni eta Belenek eraman zuten saria. Benik bolo jokalari onenaren saria eraman zuen, eta Belenek estilo onenaren saria.
Sariak banatu eta gero, jana eta edanaren bueltan ospatu genuen ikasturte bukaera.
Ikasturte edarra izan da.
Atzo, beste behin ere, Durangaldean euskara bizi bizi dagoela erakutsi ziguten. Ehundaka pertsona ari dira euskara ikasten, eta beste hainbeste astero elkartzen dira praktikatu eta hobetzeko.
Eskerrik asko guztioi.
Euskarak batzen gaituelako. Segi dezagun euskara maitatzen eta gozatzen!

BOLO TXAPELKETA ETA IKASTURTE BUKAERAKO JAIA

Ikasturte bukaera ospatzeko plana proposatzen dizuegu. Ekainaren 12an, asteazkena, Berrizko bolatokian elkartuko gara. Bolotan jokatu eta luntxa egingo dugu  Ganekoetxen.

Lagun artean eta giro onean ikasturte bukaera ospatzeko plan bikaina!

 

 

ARGAZKI LEHIAKETAKO IRABAZLEA

Heldu da momentua, heldu da eguna irabazlea zein den esateko.

Argazkilari eta berbalagunen arteko erabakia izan da,eta kostata hartutako erabakia.

Iñigo Unzueta (Berriz) da irabazlea. ZORIONAK IÑIGO!

Eta Eskerrik asko parte hartu duzuen guztioi.

Jarraitu txoko guztietan euskaraz bizitzen!

Mugarrako mehatzea. Leku honek umea nintzeneko abenturak dakarzkit gogora. Gurasoekin lehenengoz koba baten linternakin ibili nintzenekoa.Sortu zidan zirrara gogoan dut oraindik. Lekua berezia egiten zait, bakartia eta durangaldeko ikuspegi ederra du gainera.

 

Argazki lehiaketara aurkeztutako azken argazkiak

 Hona hemen "Durangaldeko txokorik ederrena" argazki lehiaketara aurkeztutako azken argazkiak.

Gaur esango dugu zein den irabazlea.

Zorte on guztioi!

 Mugarrako mehatzea. Leku honek umea nintzeneko abenturak dakatkit gogora. Gurasoekin lehenengoz koba baten linternakin ibili nintzenekoa.Sortu zidan zirrara gogoan dut oraindik. Lekua berezia egiten zait, bakartia eta durangaldeko ikuspegi ederra du gainera.

 Durangaldean zortzi urte daramatzat bizitzen eta izugarri guztatzen zaizkidan txoko pilo bat daude. Aukeratu dudana Elorrio eta Berriz artean kokatuta dago, Berriozabaletako iturria da.
     Bere estiloagatik atentzioa ematen du, Inka estetika baitu. Izan ere, XIX.mendean egitea agindu zuen pertsona Perun bizi izan zen.
     Oso leku ederra eta lasaia da. Bistak zoragarriak dira , hemendik Anboto eta Alluitz ikus daitezke.

Gorostien artean, Untzillaitz ikustea gustatzen zait.  Bolatxo gorrizkak marko aproposa da haitzarentzat. Untzillaitz, lamientzako mendi-aterpea. Lilura berezian sinestuz gero, leihoa aurkituko duzu. Hortxe nire txoko xarmangarria.

BISITA GIDATUA INTXORTAKO FRONTERA

Ibilbide kulturala Gerra Zibilaren inguruan:

Elgeta – Intxortako Atea.

Gerra zibilaren historian leku nabarmena betetzen du Elgetak, altxatutako indarrek 1936ko urritik 1937ko apirilaren amaiera alderarte herria hartu nahian ibili baitziren. Intxorta mendian borrokaldi garrantzitsuak izan ziren. 

Lehen borrokaldian, 1936ko urrian, faxisten erasoaldia gelditzea lortu zen. Frontea bertan izan zen geldirik zazpi hilabetez, eta horren arrazoietako bat Beldarrain Komandanteak lubakiz osatutako defentsa sistema berezia izan zen. 

• Irteera ordua eta lekua:  10:00etan Memoria Historikoaren Euskal Interpretazio Zentrotik, Espaloia Kafe Antozkian (Elgeta)
• Iraupena: hiru ordu
• Parte hartzeko aurrez izena eman behar da telefono honetara deitu edo whatsappa bidalita: 639 400 786
• Sarrera dohainik.

Argazki lehiaketara aurkeztutako argazki gehiago

Hona hemen Durangaldeko txokorik ederrena argazki lehiaketara aurkeztutako beste argazki batzuk.
GOGORATU! argazkiak aurkezteko azken eguna maiatzaren 29a izango da.

OIZ

Erreka gardenak, amaigabeko bidezidorrak, lasaitasuna...Mendi tontorretik itsasoa, herriak eta urrun dauden mendiak ikusten dira. Noizean behin, lainoek behean dauden herriak nola estaltzen dituzten ikus daiteke, itsasoko aparra balitz bezala. Urrutitik ikuste daitezkeen eolikoak ere paisaiaren parte dira eta nola edo hala, nire etxea hurbil dagoela diote.

 Abadiñon, Olako zubia.

Ahmed, ama hil da...- esan nion gure saharar-euskaldun semeari.

Besarkada amaigabe baten elkartu ginen bixok. Gero bere indar guztiak bihotzean batuz, etxetik irtetzen sentitu nuen.

Badakit, seguru nago, Olako zubira hurreratu zala Jadussaren bila.

Ahmedek, umetan zubi erraldoi batekin egiten zuen amets; denbora laburrean Saharara zein Abadiñora     noiznahi eramango zuena...

Nire Durangoko txokorik gogokoena hau da. Naiz eta Ana Deunako arkua hain famatua eta polita izan, niri, batez ere, gustatzen zaidana ondoko etxea da.

Beti gogoratzen naiz txikitatik gaztelu bat iruditzen zaidala. Lehioak, sarrera, balkoia ipuinetan agertzen diren bezala, eta ondoan erreka, arkua era Eliza, izugarria!!

Oso ezaguna ez den arren,  niretzat Durangoko etxe politena  dudabarik da.

"Lilia eta Mugarra"

Neure lorategiko lili baten soiltasuna handitasun bilakatzen da Mugarra atzean dotore altxatzen denean. Landareen samurtasuna eta kareharriaren babesa lagun ditut neure Durangaldeko bizitza honetan. Horregatik hau da, Durangaldeko nire txokorik gogokoena.

BARRY MANLEY ZALDIBARREN

Barry Manley Irlandarraren euskarazko umorezko bakarrizketa Zaldibarren

Barry Manley irlandarrak euskarazko bakarrizketa eskainiko du datorren astezkenean, maiatzaren 29an, arratsaldeko 19:00etan Sorgin tabernan. Lagun giroan eta euskaraz arratsalde ederra pasatzeko aukera ezin hobea. Sarrera librea izango da.

 

 

FAMILIAN EUSKARAZ JOLASEAN ZALDIBARREN

Kaixo, berbalagun!

Jolasak ezinbesteko garrantzia dauka haurraren garapenean. Jolastuz eta abestuz, zenbait gaitasun eta trebezia garatzeaz gain, euren euskararekiko motibazioa, ezagutza eta erabilera areagotzen da.

Urtxintxakoen eskutik ezagutuko ditugu guraso eta seme-alaben artean euskaraz ondo pasatzeko hainbat jolas eta kantu erraz. 

ARGAZKI LEHIAKETARA AURKEZTUTAKO ARGAZKIAK

Berbalagunok,
Hemen dituzue Durangaldeko argazki lehiaketara aurkeztutako argazkiak. Gogoratu, txapelketan parte hartzeko epea datorren astelehenean, maiatzaren 27an, agortuko dela. Asteburu hau aprobetxatu argazkiak ateratzeko. Gogoratu argazkiarekin batera zergatik duzun gustuko azaldu behar duzuela (30-50 hitz).
Datorren asteazkenean, maiatzaren 29an, iragarriko dugu irabazlearen izena. Argazkia eta testua, modu berdinean baloratuko dira, biak dira garrantzitsuak.
Zorte on parte hartu duzuen guztioi.

 
Hau da Durangaldeko nere txokorik gogokoena. Elorrixoko San Agustín auzoa, Anboto atzean zaindari daukana... Zergaitik? Negua, udazkena, udaberria zein uda izan, etxeko lehioak zabaltzen dittudan bakoitzean Euskal Herria ikaragarri ikusgarria dala egunero gogorarazten didalako.

 

URKIOLA......Derrigor ikusi behar dan tokia.

Naturaz gozatzeko leku paregabea da. mendz inguratuta.Urkiolako Santuarioa eta ermitak be ikustekoak diez.Entzuna dot eleizako teilatuko urak Kantauri eta Mediterraneo itsasora doazela.Harriari be hamaika buelta emondakoak gara bikote billa eta baita Santa Apolonia ermitari be,iturriko ura ahoan hartuta,hagiñen mesedetan

 

Etxetik gertu ,Saibigain daukagu,Mañaria gaiñean.Gerra zibillean borroka odoltsuak  egon ziren eta horren aztarnak bertan betiko gelditu dira.

Nañoz egiteko osteratxo polita dogu,ez oso nekeza eta edonok egiteko modukoa.Goian gaudela,gure begiak inguru zabala eta zoragarria ikusiko dute eta batek daki,...baliteke Anbotoko Mari Oizerako bidean ikustea.......

Berrizen eta Zaldibarren artean dagoen ibilbidean nire tokirik gustokoena dago. Bi haritz erraldoiak eserleku bi babesten dituzte. Urtean  zehar hostoak eransten eta jansten ikusten ditut eta beroa aillegatzen, ibiltariei itzala eta atsedena eskaintzen dizkiete. Txokoa bakez beteta dago.

Espero dut zuei  ere argazkia gustatzea.

Naz Otxandixokue eta argazkixetan igerten da ez?
Zer kontau nire herrixaz argazkixek kontetan daurie nehiku ta!!
Gure arbasuei gure notzien egin gogoramen bat 3 argazki hauekin.
Besterik gabe Otxandixotaz harro dagoen herritar bat.

GARAIRA BISITA ARRAKASTATSUA

Garagardoaren bueltan arratsalde paregabea igaro genuen atzo Garain. Edatera ohituta gauden garagardo industrialarekin alderatuta, oinarrizko lehengaiak eta ekoizpen prozesu tradizionalak erabiltzen dituzte.

Garagardoaren artisauak dira Ibon, Ekaitz eta Edu; ekoizpen eta errezeta propioagaz marka multinazionalen alternatiba direla erakutsi dute.

Garagardoa egiteko prozesua azaldu ziguten. Berbalagunok garagardozaleak gara eta hainbat zalantza argitu zizkiguten. Horrez gain, garagardo mota desberdinak probatu genituen janari goxoz lagunduta. 

Eskerrik asko berbalagunoi eta Garaiko garagardogileei euren etxeko ateak irekitzearren.

MASAJE IKASTAROA

Berbalagun!

Maiatza bukatzeko....masaje ikastaroa!

Erlaxatzeko gogorik? Horrela bada, etor zaitez berbalagunetik antolatu dugun masaje ikastarora.

Gorputza eta arima zaindu euskaraz.
Plaza mugatuak dira eta izena eman behar da.
Deitu edo idatzi mezua telefono honetara: 639 400 786

Xehetasun gehiago kartelean.

DURANGALDEKO TXOKORIK EDERRENA ARGAZKI LEHIAKETA

Kaixo, berbalagun!

Durangaldeko zure txokorik gustukoena zein den ezagutu nahi dugu, baita zergatia ere. 

Argazkilari eta berbalagunak izango dira epaimahai. Argazkia eta testua (30-50 hitz) berdin baloratuko dira. Irabazlearentzat saria:Durangoko Kobika jatetxean bi pertsonentzako bazkari edo afaria

Maiatzaren 27ra arte jasoko ditugu proposamenak.

Bidali zure mezua durangaldea@aek.eus helbidera, edo whatssapez zenbaki honetara: 639 400 786

Durangaldea emozio ugari sortzen diguten irudiz josita dago. Emozio horiek magia berezia dute euskaraz biziz gero, berbalagunok ondo dakigu hori. Beraz, atera kamera, hasi magia egiten, eta kutxa gaitzazu zure magiarekin.

Jasotako argazkiak durangaldea.blogspot.com hebidean egongo dira ikusgai.

GARAGARDOTEGIRA BISITA

Kaixo, berbalagun!

Garagardoa gustatzen al zaizu? Erantzuna baiezkoa bada, ez galdu berton bertoko Garai garagardo artisaua gertutik ezagutzeko aukera.

Garagardoa egiteko prozesua ezagutu eta garagardo mota desberdinak dastatzeko aukera izango duzu.

Plaza mugatuak daude eta izena eman behar da.

Deitu edo idatzi whatssapa zenbaki honetara: 639 400 786 

SUKALDARITZA TAILERRA SALTSANEN

Kaixo, berbalagun!

Sukaldean aritzea gustatzen zaizu? Jatea bizitzako plazer handienetakoa dela uste duzu? Bada, zatoz datorren asteartean Saltsanen egingo dugun sukaldaritza tailerrera.  Errezeta goxoak egin eta jango ditugu. Osagai magikoa: EUSKARA.

PLAZA MUGATUAK! Bizkor ibili eta deitu edo bidali whatsappa telefono honetara: 639 400 786

 

"Bakean dagoena bakean utzi" ANTZERKIA BERRIZEN

Euskaldunok pertsona serioen ospea omen daukagu. Egia ote da? Inolaz ere ez!

Euskara hizkuntza bizia eta alaia dela erakusten dugu behin eta berriz berbalagunok. Bada, plan bikaina daukagu oraingoan berbalagun eta umorea maite duen euskaldun ororentzat. 

Lankuk ekoitzita, "Bakean dagoena bakean utzi" izeneko bikotekako bakarrizketa saio umoretsua antzeztuko dute Mirari Martiarenak eta Idoia Torregaraik martxoaren 21ean Berrizen. Euskara eta generoari buruzko hainbat kontu aletuko dituzte.

Betaurreko moreak jantzita gustura egingo dugu barre elkarrekin.

 

KULTUR LEHIAKETAKO IRABAZLEA

Durangaldeko berbalagunen Kultur Lehiaketak badauka irabazlea: Alfredo Berrojalbiz. ZORIONAK!
400dik gora berbalagun, ikasle eta herritarrek parte hartu duzue, eskerrik asko eta zorionak guztioi. Gero eta gehiago gara eskualde euskaldun baten alde lan egiten dugunok. Bakoitzak bere aletxoa jarriz soilik lortuko dugu Durangaldea euskahalduna.
EGIN KLIKA EUSKARAREN ALDE!

ARDO DASTAKETA DURANGON

Ikasturtea hasi denetik, hainbat ikastaro antolatu ditugu Durangaldean: yoga, euskal dantzak, Txan magoa, sukaldaritza begetarianoa... Gauza bat dute komunean: EUSKARA. Eta horretan jarraituko dugu, euskarari hauspoa ematen.

Oraingoan, gutako askoren pasioak piztuko dituen ikastaroarekin gatoz zuengana: ARDO DASTAKETA. Ardoa eta euskararen bueltan arratsalde ederra pasatu nahi baduzue, ez pentsatu bi aldiz eta etor zaitez.
Dohainik da eta plaza mugatuak daude.
Bizkor ibili eta deitu edo bidali whatssapa telefono honetara: 639 400 786

SUKALDARITZA BEGETARIANOA IKASTARO ARRAKASTATSUA ELORRION

Lagun giro apartean, amantalak soinean eta euskara mihian arratsalde paregabea igaro genuen ostegunean Elorrion.
Hostorezko porru pastela eta azenario bizkotxoa egin genituen. Errezetak partekatu eta zalantzak argitzeko tartea ere izan genuen.
Eta bukatzeko,nola ez,  hainbeste mimoz egindako errezetak jan genituen denon gozamenerako. Euskararen osagai magikoa nabaritzen zen plateretan, ezin goxoagoa zegoen guztia.
Sabela beteta, ikasita, berbalagun kide berriak ezagututa eta errezetak eskuan pozik bukatu genuen ikastaroa. 

SUKALDARITZA BEGETARIANOKO TAILERRA ELORRION

Elikadura gure sasoiaren, umorearen, eta bizitza pertsonal nahiz profesionalaren oinarria da.
Guztiok dakigu teoria: gimnasiora joan, izerdia atera, gantza gainetik kendu, eta ondoren pastel bat jatea ez da aproposena.  Gaurtik aurrera hori guztia aldatzeko prest baldin bazaudete, adi egon!

Zatoz Elorrion egingo dugun sukaldaritza begetariano tailerrera, eta errezeta goxo bezain osasuntsuak ikasiko dituzu.

DOHAINIK DA eta izena eman behar da: 639 400 786

DANTZA IKASTAROA ABADIÑON

Konturatu orduko badator udaberria, eta eguzkiarekin batera badatoz erromeriak gure herriko plazetara!
Pasa den asteko dantza ikastarora joateko aukerarik ez bazenuten eduki, egon lasai, ostegun honetan beste aukera bat izango duzue.
Erromerietan ohikoenak diren dantzak ikasiko ditugu.
Dohainik da eta plaza mugatuak daude. Deitu edo idatzi whatsappa telefono honetara: 639 400 786

PLAZAKO DANTZAK IKASTAROA MATIENAN

Sekula ez omen da berandu gauza berriak ikasteko. Durangalde edo Euskal Herriko edozein plazetan gustura dantzan aritu nahi baduzu, oraintxe da zure aukera. Erromerietan ohikoenak diren plazako dantzak ikasteko aukera aparta daukazu Abadiñon otsailaren 7an eta 14an.
Dantzan ikasteaz gain, lotsa galdu eta ondo pasatzeko aukera paregabea!

KUNDALINI YOGA ELORRION

Kaixo, berbalagun:

Oraingoan Kundalini yoga egiteko gonbidapena egin nahi dizugu Elorrion.
Yogaren bitartez, ongizate fisikoa eta oreka emozionala lortzen ditugu. Emozioak lantzen eta burua garatzen laguntzen digu. Azken finean, barrualdea eta kanpoaldea orekatzean, barne-bakea eta bizi-poza ematen digu.
Xehetasun gehiago kartelean dituzu.

TXAN MAGOA

Kaixo, berbalagun:

Sinisten al duzue magian? Erantzuna baiezkoa bada, magiaz gozatzeko aukera ezin hobea eskaintzen dizugu. Erantzuna ezezkoa bada, aldiz, Txan Magoaren azken ikuskizunarekin iritzia aldatuko duzue.
"Inpernutik natorren artista bat naiz ni" sorkuntzaren bitartez, magiaren munduan murgilduko gara berbalagunok datorren asteazkenean Durangon (Pinondo etxea).