durangaldeko berbalagunak

LASTER. Talogintza tailerra Iurretan

2012-01-26T19:25:00.002+01:00

Western-etako behizainak, zaldiak kanpoan utzi ostean, salooneko barrara ailegatutakoan paratzen diren moduan, bata; eta beharra ondo egiten dabilen konfiantzak ematen duen lasaitasunaz, bestea. Horrela posatu zuten iaz gure lagunek -argazki kameraren begiari zirkinik egin barik, gainera-, Berbalagunek Elorrioko Alkartu txokoan antolatu zuen talogintza-ikastaroan.

Aurten, berriz, iurretarren txanda da. Martitzenean, arratsaldeko 6etan, Montosten, iurretar orok izango du taloak egiten ikasi eta dastatzeko aukera, Berbalagunen eskutik. Bai portzierto!. Beraz, taloak egiten ikasteko edo jateko gogotsu bazabiltza, etorri gugana lotsa barik. Ez zara damutuko!

LASTER. Auzorik Auzo ibilaldia

2012-01-24T11:42:00.000+01:00

Domekan, hilak 29, Auzorik Auzo ibilaldia izango da Abadiñon, Hamabi Harri auzo-elkarteak antolatuta. Oinez egiten den martxa honen helburua xumea bezain aberasgarria da: Abadiñoko auzoak ezagutzea, ibilaldiaz gozatuz.

Aurtengo edizioan, parte-hartzaileek Abadiñoko hainbat baselizetan zehar burutuko dute ibilaldia; Salbadore, San Prudentzio, San Bizente, Aingeru Guarda, San Trokaz, San Martin, San Antolin, Santa Eufemia, Santa Luzia, San Kristobal, Andra Mari eta Aita Kurutzeko baselizetan zehar, hain zuzen ere.

Goizeko 8,30etan Gerediagako plazan egingo den sinatze-ekitaldiak emango dio hasiera Auzorik Auzo ekimenari. Ordu erdi geroago, familia-argazkia atera ondoren, ibilbideari ekingo diote parte-hartzaileek. Hauen indarrak berreskuratzeko, gune bi egokitu dituzte antolatzaileek: Gazteluko San Martinen fruta banatuko dute, eta 10,30etatik aurrera salda egongo da Irazola auzora heltzen direnentzat.

Ibilaldia amaitutakoan, Zelaietako probalekuan, luntxa egongo da erromeriaz alaituta. Eta, gainera, hainbat sari zozketatuko dira ekitaldian izena eman dutenen artean artean. Ezetz domekarako plan hoberik topatu!

Olentzero etorri zaigu...

2012-01-11T23:42:00.004+01:00

Argazkian, Nerea Mandaluniz Kultur Lehiaketako irabazlea eta bere seme-alabak Hitz liburudendako arduradunekin, lehiaketako saria zen liburu-sorta ederra jaso ondoren.

Bejondeizula, Nerea.

Lehiaketako irabazlea

2011-12-15T00:41:00.000+01:00

Aurtengo edizioan 200 bat lagunek esku hartu dute lehiaketan: gehienek berbataldeetatik koordinatzaileari orria entregatuz, 30 batek Anboto astekariaren bitartez, eta banaka batzuek blog honen bitartez. Beraz, partehartze polita egon dela esan dezakegu.

Nerea Mandaluniz, argazkiko berbalaguna, izan da aurtengo Kultur Lehiaketako irabazlea. Abadiñar honek Anboto astekarian argitaratutako galdetegia bete zuen, eta ez edozelan bete; izan ere, lehiaketako hamasei galderentzako erantzun zuzenak aukeratu zituen. Liburu-sorta, beraz, Zelaietara doa aurten.

Zorionak, bada, Nerea! Eta ea liburuak gustatzen zaizkizun!

* Lehiaketako erantzunak:
1. Zein da Durangoko mendirik garaiena? (a) Pagasarri.

2. Durangaldean eztegu berba erabiltzen da; baina zer esan nahi du? (c) ezkontza.

3. Zein herritako armarrian ikus daitezke lehoiak? (c) Elorrioko armarrian.

4. Zelan esaten zaio erbinudeari Durangaldean? (a) ogigaztaia.

5. Zaldibarko bainuetxea 1846. urtekoa da; baina nork eraiki zuen? (b) Peñafloridako konteak.

6. Zein zarata egiten du tiroak? (b) danba.

7. Zein da Amanita Phalloides perretxikoaren izen arrunta? (a) hiltzaile berdea.

8. Iurretako Kofradien Eguna Laixiarren ospatzen da, baina noiz? (a) iraileko bigarren domekan.

9. Zertan dabil jendea, drogan dihardunean? (a) borrokan.

10. Zein da Durangoko elizarik zaharrena? (c) Tabirako San Pedro.

11. Zer da itsuskia? (a) erratza.

12. Zein da Berrizko markesaren benetako titulua? (a) Berrizko markesa.

13. Txantxurrika bagabiltza, zelan gabiltza? (c) hanka baten gainean.

14. Noiz erosi zuen Durangoko Merindadeak Astolako Etxea? (a) 1576an.

15. "Abadearen lapikoa, txikia baina..." (b) gozoa.

16. Zein da Berbalagunen aurtengo kanpainaren leloa? (a) "euskara atsegin dut".

Lehiaketako galderak

2011-11-29T22:18:00.001+01:00

Liburu-sorta ederra daukazu zain: klikatu hemen, eta bidali erantzunak, izen-abizenak eta telefonoa.

LASTER. Sentiberatze tailerra

2011-11-29T17:40:00.001+01:00

Ostegunean, abenduak 1, iluntzeko 6,30etan, euskararen erabilera soziala bultzatzeko ikastaroa antolatu du Berbalagunek Pinondo Etxean. Ikastaroa dohainik da eta 12 lagunentzat egokitua.

Euskararen erabilera sozialaren inguruanhausnartzea du helburu ikastaroak. Aurrez aurreko elkarrizketetan hizkuntzari eusteko teknikak baino, hausnarketarako arrazoiak eta gakoakjorratzen dira ikastaroan. Hizkuntzaren aldeko argudioak eskaintzen dira; eta, bide batez, partehartzaileen hizkuntzaren aldeko jarrerak indartu.

Tailerra interesgarria iruditzen bazaizu, eman izena lehenbailehen, Berbalaguneko telefonora deituz, edo posta elektronikoz.

LASTER. Kultur Lehiaketa

2011-11-24T21:20:00.001+01:00

Dagoeneko antolatua dugu Durangaldeko Berbalagunen III. Kultur Lehiaketa. 16 galdera, 48 balizko erantzun (3 aukera galdera bakoitzeko) eta betiko gaia (Durangaldea) dira lehiaketa honen osagaiak.

Orain arte, lehiaketan parte hartzeko era bakarra izan dugu: berbataldeen bitartez (lehiaketa-orriak berbataldeetan izan dira banatuak eta jasoak). Aurten, berriz, kultur lehiaketan parte hartu ahal izatea erraztezko asmoz, esku hartzeko era "klasikoa" gainditu nahi izan dugu, eta, ondorioz, lehiaketa Anboto astekarian (bihar) eta blogean (datorren aste osoan) jarriko dugu eskuragarri, erabilia izateko prest.

Ah! Ez ahaztu liburu-sorta ederra zain daukazula.

Berbataldeak abian Durangaldean

2011-11-09T22:49:00.009+01:00

Asteon jo du Berbalagunek abiatzeko banderakada Durangaldean. Banderakada jotzeaz batera, Durangaldeko berbalagun gehienak hasi dira asteon lehenengo hitzordua lotzen. Badaude, hala ere, berbatalde batzuk irailetik, eta beste batzuk urritik, martxan daudenak. Eta datorren astean ere izango da lehendabiziko hitzordua izango duen berbatalderik.

Ongi etorri, berbalagunok!

Berbalagunen aurkezpena Durangon

2011-11-02T16:44:00.004+01:00

Bihar, iluntzeko 7,30etan, Durangoko Berbalagunen aurkezpena izango da Pinondo Etxean. Aurkezpenean egitasmoari buruzko informazioa emateaz gain, berbataldeen ordutegiak eta berbalagunak batzeko tokiak ere zehaztuko dira.

Durangon Berbalagun egitasmoa abian dago, beraz. Halaber, Zaldibar, Berriz, Abadiño, Elorrio eta Iurreta ere prest daude datorren astean Berbalagun egitasmoari hasiera emateko.

Oraindik izena eman barik bazaude, jarri zaitez lehenbailehen gurekin harremanetan eta lekutxo bat egingo dizugu.

Euskara atsegin dut!

2011-10-30T21:47:00.002+01:00

Berbalagun egitasmoa euskaraz berba egiteko ohitura duten pertsonak euskaraz berba egiteko ohiturarik ez duten pertsonekin batzean datza; batzuek zein besteek euskara maite dute eta euskaraz berba egitea, euskaraz komunikatzea eta euskara lau haizetara zabalzea dute helburu.

Euskal Herriko Berbalagunekook, EUSKARA ATSEGIN DUGUNEZ, ondoan izan nahi zaitugu, zeuk ere euskara maite eta atsegin duzulako. Ongi etorri Berbalagunera!

Prentsaurrekoa, bertatik bertara

2011-10-27T22:25:00.005+01:00

Hemen daukazue pasa den astean Ibarretxe Kultur Etxean eman genuen prentsaurrekoaren laburpena.

Serioegi gaude, ezta? Zer deritzozue?

Prentsaurrekoa

2011-10-17T19:26:00.005+01:00

Etzi, hilak 19, goizeko 11etan Iurretako Ibarretxe Kultur Etxean, Durangaldeko Berbalagunen 2011-2012 ekitaldiko aurkezpen ofiziala egingo dugu egitasmoaren arduradunok. Iazko jardunaldiaren balorazioa, aurtengo kanpainari buruzko informazioa eta aurtengo helburuak eta erronkak izango ditu berbagai prentsaurreko honek.

Egitasmoari buruzko informazioa zuzenean jaso nahi baduzu, etorri zaitezke, bada, etzi Ibarretxe Kultur Etxera eta saiatuko gara zure jakingura asetzen.

Gero arte

2011-07-15T09:29:00.003+01:00

Geuk ere euskara atsegin dugu, zer esanik ez! Bai, lagunak, euskara maite dugu eta ezin gara bera barik bizi. Ez dakigu bera barik lan egiten, ezin dugu oporretara joaten garenean etxean utzi, ezta une goxoetan edo haserretzen garenean bazter baten ahaztu ere. Badakigu, jakin ere, euskara zeuetako askoren bizilaguna dena eta zeuek ere euskara atsegin duzuena. Eta horregatik gu denok zorioneko gara, euskara bera ere gure laguna delako eta bere ondoan nahi gaituelako.

Beno, lagunak, laguntasunak atsedenik ez ei du hartzen, baina gure blog honek bai. Blogak udan atsedenaldi txiki bat hartuko du eta irailean berriro izango dugu erabilgarri. Bide batez, agur xume hau aprobetxatuz, doala hemendik besarkada handi bat euskara maite duzuen guztiongana Berbalagun egitasmoko dinamizatzaileon partez. Gero arte.

Ziortza eta Julio

Errepasoa egiteko sasoia. Berbalagunak

2011-06-28T20:30:00.013+01:00

Iurreta

10 berbalagun 2 taldetan

Elorrio

30 berbalagun 6 taldetan

Berriz

21 berbalagun 3 taldetan

Durango

99 berbalagun 12 taldetan

Abadiño

20 berbalagun 4 taldetan

Zaldibar

19 lagun 3 taldetan

Errepasoa egiteko sasoia. Ekitaldiak

2011-06-23T22:44:00.027+01:00

Osteratxo bat Himalayan barna ikus-entzunezkoa

Joseba eta Estiren eskutik

azaroaren 25ean Pinondo Etxean.

Muntaia bitxia.

Ardo-dastaketa ikastaroa

Ana Larrañagaren eskutik

abenduaren 13an Zaldibarko Goierriko txokoan.

Berbalagunez josita.

Ardo-dastaketa ikastaroa

Ana Larrañagaren eskutik

abenduaren 14an Matienako Errota kultur etxean.

Partaide beste aditu!

Gabonetako afaria

abenduaren 17an Berbaroren txokoan.

Kantu kantari.

Sagardotegira irteera

otsailaren 26an Aginagako Urdaira sagardotegira.

Txotx!

1000 milla ikus-entzunezkoa

Urdin eta Izaroren eskutik

martxoaren 31n Iurretako Ibarretxe kultur etxean.

Bidaiarien barne-barnetik emandako saioa.

Talogintza tailerra

Nieves Aranoa gidari

apirilaren 12an Elorrioko Alkartu txokoan.

Ikasi, egin eta jan!

RAM memoria argazki-erakusketa

Zaloa Fuertes argazkilariak aurkeztuta

ekainaren 1ean Zelaietako mediatekan.

Polita eta hunkigarria.

Alaskatik Ushuaiara bizikletaz bidaia-diaporama

Endika Fernandez-en eskutik

ekainaren 9an Zaldibarko liburutegi "zaharrean"

Interesgarria bezain sentimentala.

Ikasturte amaierako jaia

Erromeria.com-ekin

ekainaren 11n Plateruena kafe-antzokian.

Giro atseginez.

"Erdi aroko Durango eta Kurutzesantu museoa" bisita gidatua

ekainaren 14an.

Arratsaldeko saioa, hobea.

Euskaldunon dena ospatu beharra!

2011-06-16T21:02:00.012+01:00

Begi bat zabalik eta bestea zabaltzeko pronto da uda; berbalagunon aurtengo jardunaldia, alderantziz, begi bat itxita eta bestea ixteko gertu. Bai, lagunok, elkar agurtzeko sasoia ailegatu zaigu berbalagunoi. Baina lasai, lagunok, udak ere begiak itxiko ditu eta udazkena keinuka izango baitugu zain berbalagunok, datorren ikasturteari hasiera emateko.

Eta, jakina, ez dago euskaldun izaterik, behin elkar agurtzeko sasoia helduta, ospakizunik egiten ez bada. Eta horixe da, hain zuzen, gure berbalagunak garai honetan egiten dabiltzana: Ospatu! Ospatu eta... ospatu! Edozelan, baina ospatu! Beno, edozelan... edozelan... Gehienetan janaria tarteko dela egiten dugu euskaldunok ospakizuna. Hamaiketakoa, bazkaria, afaria, askaria edo pintxo-poteoa; edozein erak balio du ospakizunetarako, baina janaria eta edaria lagun, hori bai!

Zelaietako berbalagunek, esaterako, ez dute ospatzeko aukera hau galdu nahi izan eta atzo Soloa jatetxera joan ziren bazkaltzera. Argazkian antzeman daitekeenez, gainera, ez du ematen oso despedida tristea izan zutenik. Ez horixe!

Durango ezagutuz

2011-06-14T21:23:00.007+01:00

Gaur Durangoko berbalagunok herria hobeto ezagutzeko aukera paregabea izan dugu Turismo Bulegoarekin batera antolatu dugun "Erdi Aroko Durango eta Kurutzesantu museoa" ibilbideari esker. Bisitaldi bi izan dira gaurkoak: goizeko 10etan, bata; eta arratsaldeko 6etan, bestea.

Jon eta Uxue bisita-gidariek Durango uriaren sorreraren eta garapenaren berri eman eta hainbat eraikin historikoren gaineko ezaugarri eta berezitasunak azaldu dizkigute. Argazkian ikusgai dagoen Uribarriko Andra Mari basilikari buruz, esaterako, makinatxo bat kontu eta bitxikeria kontatu digute Jonek eta Uxuek.

Turisten moduan ederto baten ibili gara gaur makinatxo bat durangar. Eta herritik irten ere egin barik!

LASTER. Euskara-ikasleen eta berbalagunen jaia

2011-06-07T22:50:00.003+01:00

Zapatuan euskara-ikasleek eta berbalagunok ikasturte amaierako jaia ospatuko dugu. Ordu batean poteotxoa egingo dugu Goienkaletik Plateruena kafe antzokira, trikitixak girotuta. Ordu bi eta erdietan bazkaria izango da Plateruenan bertan, eta bazkalostean Erromeria.com arituko da bere musika eta kantuak lau haizetara zabaltzen.

Plan hoberik egongo da, egon; asko, gainera; baina hauxe ere ez da makala, ezta?

LASTER. Alaskatik Ushuaiara bizikletaz

2011-06-05T21:53:00.007+01:00

Ostegunean, hilak 9, arratsaldeko 7,30etan, Zaldibarko liburutegi "zaharrean" "Alaskatik Ushuaiara bizikletaz" bidaia-diaporamaz gozatzeko aukera izango dugu.

Berbalagun-ek antolatutako ekitaldi honetan Endika Fernandez ermuarrak Ameriketan zehar bizikletaz egin zuen abentura-bidaian izandako bizipenak kontatuko dizkigu, musikaz eta irudiz lagunduta.

Bidaiaren datu solte batzuk ematearren:

- Anchorage (Alaska) - Ushuaia (Argentina)

- 2005eko maiatzetik 2006ko ekainera

- 22.115 km. bizikletaz

- 176.584 m. aldapan gora

Beno, ez dugu uste ekitaldia erakargarria dela ziurtatzeko informazio gehiago ematea beharrezkoa denik, ezta? Eta zuek?

LASTER. Bolo-txapelketa

2011-06-04T22:17:00.005+01:00

Asteazkenean, arratsaldeko 7etan, Berrizko Ganekoetxe pareko bolatokian bolo-txapelketa izango da, Berrizko AEK-k antolatuta. Ekitaldia lehiaketak ez ezik, lehiaketaren ondoko luntxak ere osatuko du.

Bertaratutakoen artean taldeak egin eta txapelketaren epailea izendatu ondoren, bolo-txapelketari ekingo diote parte hartzaileek. Parte hartzaile bakoitzak botaldi bi egin ahal izango ditu eta helburua zutik dauden "txirloak" lurreratzea izango da. Azkenean, puntu guztiak batu eta puntu gehien lortu dituen taldeak luntxa doan izango du, gainontzeko partaide guztiek euren lepo hartuko baitute luntxaren ordainketa.

Bolo-txapelketaren antolatzaileek txapelketa honetan edozein euskara-ikaslek, berbalagunek edo euskaltzalek parte har dezakeela adierazi digute, parte-hartzea zabala izan dadin nahi dute eta.

LASTER. "RAM memoria" argazki-erakusketa

2011-05-27T10:06:00.008+01:00

Datorren asteazkenean, ekainak 1, arratsaldeko 7,30etan Zelaietako liburutegian RAM memoria izeneko argazki-erakusketaren aurkezpena egingo du Zaloa Fuertes argazkilariak. Aurkezpenean Zaloak argazkien sormen-prozesuari buruz egingo digu berba bertara joango garen guztioi.

Berbalagunek antolatu duen argazki-erakusketa hau ez da Zaloak egin duen lehendabiziko erakusketa, ez; beste bi gehiago ere eginda dauzka aurretik Queretaron (Mexikon), bere jaioterrian. Bai, lagunak, Zaloa Abadiñon bizi da, euskalduna da, guraso euskaldunen alaba, baina Mexikon jaioa eta bizi izandakoa.

Zaloa aurten hasi da Berbalagunen eta Abadiñoko Soloa tabernako hitzordura joaten da asteazkenetan euskera lantzera eta hobetzera. Hemen daukazue, bada, berbalagunok, beste kide bat ezagutzeko modukoa. Ah! Beste kontutxo bat: asteazkenean aurkezpenera joaterik ez daukazuenok aukera izango duzue ekainaren 10era arte erakusketaz gozatzeko.

www.zaloafuertes.com

LASTER. Ibilaldia 2011

2011-05-17T21:21:00.004+01:00

Maiatzaren 29an, Boga! aurtengo Ibilaldia 2011 Ondarroan. Ondarrutarrek "aurrera jo" esan nahi dute BOGArekin. Aurrera, indarrez, guztiok batera. BOGA euskararen alde, BOGA beraien proiektua ezagutarazteko, BOGA Ikastola-eredua indarberritzeko, BOGA beraien seme-alabengatik.

Denok ikastolarekin batera: BOGA!

KORRIKA 17. Badator! Korrika badator!

2011-04-11T22:59:00.004+01:00

Korrika 17 Durangaldera helduko da asteazkenetik ostegunera bitarteko gauean. Korrikari ongi etorria emateko hainbat ekitaldi antolatu dira eskualdeko herrietan: bertso-afariak, trikitixa-saioak, batukadak... Korrika-urteetan ohi denez, txikiek ere hartuko dute parte eskolek eta Korrika-batzordeek antolatu dituzten Korrika Txikietan.

Korrika 17ren ibilbidea eta orduak:

- Mallabia: 01:37

- Zaldibar: 01:50

- Berriz: 02:06

- Abadiño-Traña: 02:33

- Durango: 02:50

- Iurreta: 03:13

- Durango: 03:32

- Abadiño: 03:38

- Atxondo: 04:00

- Elorrio: 04:15

Ongi etorri Durangaldera, Korrika!

LASTER. Talogintza tailerra

2011-04-09T22:47:00.004+01:00

Martitzenean, hilak 12, arratsaldeko 6,30etan talogintza-tailerra izango da Elorrioko Alkartu txokoan. Berbalagun-ek antolatu duen tailer honetan taloak egiten ikasi ez ezik, dastatu ere egin ahal izango ditugu.

Arto-irinez egindako "euskal pizza" hauei laguntzeko, txistorra, idiazabal-gazta eta txokolatea izango ditugu eskuragarri; egarrirako ere Gipuzkoako sagardoa izango dugu edangai. Beraz, badakizue... etor, ikas, egin eta goza!

KORRIKA 17. Korrika-bazkaria

2011-04-04T11:17:00.004+01:00

Zapatuan, hilak 9, Plateruena kafe-antzokian korrika-bazkaria izango da eguerdiko ordu bi eta erdietan. Bazkal aurretik triki-poteoa izango da Santa Anan hasita, eta bazkalondoan erromeria egongo da Aiko taldearekin.

Har ezazu txartela lehenbailehen!

KORRIKA 17. Kriskitin hurbiletik

2011-04-04T11:07:00.002+01:00

Ostegunean, hilak 7, goizeko 10,30etan Durangoko udal bibliotekan Kriskitin hurbiletik hitzaldia izango da Egoitz Esturoren eskutik. Ekitaldi hau Durangoko Udal Euskaltegiak antolatu du Korrika Kulturalaren barruan.

KORRIKA 17. Ipuin berotikoak

2011-04-04T10:33:00.003+01:00

Asteazkenean, hilak 6, goizeko 10,30etan Durangoko udal bibliotekan Ipuin berotikoak helduentzako emanaldia izango da Kandelen argipean ipuin-kontalarien taldearen eskutik. Korrika Kulturaleko ekitaldi hau AEK-k antolatu du Durangoko udal bibliotekarekin batera.

KORRIKA 17. Korrikaren aldeko Jaia

2011-03-31T09:11:00.003+01:00

Bihar, apirilak 1, gaueko 10etan hasita, Elorrioko Arriola antzokian, musika eta bertsoa biltzen dituen jaialdia izango da. Udalak, Arriola kulturguneak eta AEK-k elkarlanean jardun dute Korrikaren aldeko egitaraua prestatzen.

Bertsoak izango du jai honi hasiera emateko ardura. Saioan Durangaldeko lau bertsolarik hartuko dute parte: Gorka Lazkano berriztarrak, Eneko Abasolo "Abarkas" iurretarrak, Beñat Ugartetxea mallabitarrak eta Eñaut Uruburu abadiñarrak. Bertsolariok Maite Berriozabal-ek jarriko dizkien gaiei erantzuten saiatuko dira.

11etan Ateneoan Sorkun-en kontzertua izango dugu. Azken hilabeteetan jorratzen ari den formatoan eskainiko digu Sorkunek kantaldia. Kontzertu akustikoa eskainiko digu, beraz, baina oso giro lasai eta intimoan.

LASTER. 1000 milla

2011-03-28T21:52:00.015+01:00

Ostegunean, hilak 31, arratsaldeko 6,30etan Iurretako Ibarretxe Kultur Etxean munduan zehar ibiltzeko parada ezinhobea izango dugu Urdin eta Izaroren eskutik. Durangaldeko gazte hauek mundu zabalean zehar bizikletaz egin duten bidaiaren ingurukoak azalduko dizkigute ikus-entzuneko emanaldi honetan.

Goiko argazkian, Urdinen ondoan, Thailandiaren hegoaldeko telebista-saltzaile ibiltari bat ikus dezakezue bere saltokiaren aurrean. Thailandiarrari Urdinen bizikleta gustatu zaiola ohartzeko, bizikletari heltzeko duen moduari erreparatzea baino ez dago. Ez dakigu asiarra truke egiten saiatu zen, baina ez litzaiguke arraro egingo pare bat telebistaren truke bizikleta erosi nahi izana. Hamaika ikusteko jaioak gara!

KORRIKA 17. "Izan, egin, eragin. EHE" dokumentalaren aurkezpena

2011-03-25T11:19:00.008+01:00

Asteartean, hilak 29, iluntzeko 8etan Izan, egin, eragin. Euskal Herrian Euskaraz dokumentalaren aurkezpena izango da Plateruena kafe-antzokian. Korrika Kulturaleko ekitaldi hau Euskal Herrian Euskaraz euskararen aldeko taldeak ekoiztutako dokumentala da.

Dokumental hunkigarri honetan hainbat EHEko kide eta euskaltzalek hogeitaka urtetan izandako bizipenak, hausnarketak eta iritziak batzen dira, beti ere euskara ardatz, hizpide eta irizpide hartuta. "Ez daude bi ur tanta berdin, baina denek dute euskaraz biziko den herriaren alde izan, egin eta eragiteko konpromisoa".

*Aurkezpenera joaterik ez baduzu:

www.argia.com/multimedia/dokumentala/izan-egin-eragin

ORAINTSU. Sagardotegian

2011-03-17T21:02:00.011+01:00

Autobus bete berbalagun izan ginen joan den hilean Aginagako Urdaira sagardotegian. Sagardotegira bidean, Getarian, egin genuen "derrigorrezko" geldialdia. Bertan, giro onean, "nahitaezko" poteoari ekin genion, trikitixaren aireek alaituta. Getariako txakolina dastatu eta gero autobusean sartu eta sagardotegirantz abiatu ginen.

Sagardotegian aurtengo Gipuzkoako sagardoa edan ahal izan genuen, baita sagardotegikoa ohikoa den menua jan ere. Afaldu ondoren kupelik kupel eta dantzarik dantza ibili ginen sagardotegian zehar (beno, egia esanda, batzuk ondoren, bitartean eta orduko ibili ziren).

Bada, dena den, sagardotegitik bueltan, eusko labeldun gutiziak dastatzearekin ase ez edo konforme ez, eta lo egitera joan baino lehen, kebab izeneko janari turkiarrari "eraso" egin zionik. Ezta, Endika?

KORRIKA 17. Euskalaketa

2011-03-15T21:51:00.006+01:00

Barikuan, hilak 18, gaueko 8,30etan Plateruena kafe-antzokian Euskalaketa bakarrizketa-lehiaketa izango dugu ikusteko eta entzuteko moduan.

Korrika Kultural barruan antolatutako ekitaldi honetako lehiakide bakoitzak lan bi egin beharko ditu. Lehenengo lana aurrez prestatutako gai libreko bakarrizketa bat izango da; bigarrena, berriz, euskalakari hitza gai hartuta garatu beharreko bakarrizketa izango da.

Apirilaren 17an Donostian finala izango duen euskalaketa lehiaketa honen lehenengo kanporaketa da Durangon barikuan egingo den kanporaketa hau.

KORRIKA 17. Neu ere euskalakaria naiz

2011-03-09T21:45:00.002+01:00

Euskal Herrian bizi dena euskal herritarra bada eta euskalduna euskaraz dakiena, zelan deitu ahal diogu euskara maitatu, ikasi eta erabili egiten duenari? Bada, horiei guztiei izena ipini nahi die Korrikak: EUSKALAKARIA.

Euskalakaria da lehenengo berba euskaraz egiten duena, euskaraz sortzen duen artista, euskaraz lan egiten duena, euskara ikasten dabilena eta umeari euskaraz egiten dion gurasoa. Euskalakaria neu naiz, eta euskalakaria zeu ere bazara!

ORAINTSU. Berbertan

2011-03-07T10:45:00.005+01:00

Oraintsu amaitu den Berbertan elkarrizketa-zikloaren bideoak dauzkazue ondoren; Benito Lertxundi eta Pako Aristi-rena, Jon Sarasua eta Amets Arzalluz-ena, eta Edurne Brouard eta Maddalen Iriarte-rena dauzkazue, hurrenez hurren.

LASTER. Edurne Brouard, Maddalen Iriarteren eskutik

2011-03-01T18:33:00.010+01:00

Eguenean, hilak 3, iluntzeko 8etan Plateruena kafe-antzokian Maddalen Iriarte kazetariak Edurne Brouard AEKkidea elkarrizketatuko du, berbertan elkarrizketa-zikloari amaiera emanez.

Edurne eta Maddalen, Maddalen eta Edurne. Nortasun handiko emakume bi, aurrez aurre, euskal kulturaren erakusgarri.

LASTER. Sagardotegira

2011-02-21T17:45:00.003+01:00

Zapatuan, hilak 26, berbalagunok Aginagako Urdaira sagardotegira joango gara. Euskaltegiek, euskara-taldeek eta oro har, euskaldunok sagardotegietara joateko dugun aspaldiko ohitura "bere" egin du Berbalagunek ere; izan ere, aurten Berbalagunek sagardotegira antolatu duen txangoa Berbalagunen zortzigarren txangoa da.

Bazkaldu ondoren -arratsaldeko 4retan- irtengo du Durangaldetik sagardotegira eroango gaituen autobusak. Bidean, ohi denez, geldialditxo bat egingo dugu Getarian kafetxoa hartu eta paseadatxoa egiteko.

Eta sagardotegian, badakizue lagunok: bakailao-tortilla, bakailao frijitua piperrekin eta txuleta. Eta intxaurrak, gazta eta irasagarra. Eta trikitixa. Eta... eta... eta TXOTX! (jakina!)

LASTER. Jon Sarasua, Amets Arzallusek elkarrizketatua

2011-02-15T23:38:00.011+01:00

Ostegunean, hilak 17, iluntzeko 8etan Durangoko Plateruena kafe-antzokian Amets Arzallus bertsolari ospetsuak Jon Sarasua bertsolari ohia eta soziologoa elkarrizketatuko du. Elkarrizketa-saio hau Plateruena kafe-antzokiak antolatutako Berbertan ekimeneko bigarren elkarrizketa-saioa da.

Euskal kultura geure esku.

KORRIKA 17. Abestia, GOSE taldearen eskutik

2011-02-11T21:21:00.002+01:00

LASTER. Benito Lertxundi, Pako Aristik elkarrizketatua

2011-02-07T18:00:00.011+01:00

Ostegunean, hilak 10, iluntzeko 8etan Durangoko Plateruena kafe-antzokian Pako Aristi idazleak Benito Lertxundi musikaria elkarrizketatuko du. Irekia izango ei da elkarrizketatzea, non entzuleek ere parte hartzeko aukera izango duten.

Elkarrizketa-saio hau Plateruena kafe-antzokiak antolatutako Berbertan elkarrizketa-zikloko lehenengoa da. Berbertan ekimenak elkarrizketatzaile zorrotzak eta zeresan handiko elkarrizketatuak batu nahi ditu, euskal kultura ardatz izanik.

Kultura eta euskara, bizirik eta zuzenean, toki zabal eta erosoan, kafeaz edo garagardoaz lagunduta. Ez dago gehiago eskatzerik, lagunok!

Berbalagun. Formulak ondo funtzionatzen du

2011-02-04T21:16:00.020+01:00

Atzo aurkeztu zituen Aztiker soziolinguistika-klusterrak Mintzapraktika egitasmoen eraginkortasuna neurtzeko ikerketaren emaitzak Bilboko Euskaltzaindiaren egoitzan. Eusko Jaurlaritzaren enkarguz egindako ikerketa hau Topagunea eta AEKrekin batera egin du Aztikerrek.

2004-2005 ikasturtetik 2008-2009 ikasturte artean jasotako datuak aztertuta, mintzapraktika, zalantza barik, eraginkorra dela ondorioztatu dute Aztiker taldeko teknikariek. Izan ere, parte-hartzaileen %95ek mintzapraktikari esker euskara maila hobetu duela dio. Gainera, euskara lehen baino gehiago erabiltzen duela baieztatu du %90ek eta lagun euskaldunekin euskaraz gehiago egiten duela %76k.

Horrez gain, Mintzapraktika egitasmoen parte-hartzaile kopuruaren hazkundea nabarmentzekoa da, 2004-05 ikasturtean 1.041 lagun izatetik ikasturte honetan 4.000 lagun inguru izatera heldu gara eta. Horrelako hazkundea izaten duten ekimenak oso gutxi direla eta masa-fenomeno baten aurrean egon gaitezkeela azaldu dute ikerketaren arduradunek.

ikus txostena

Berbalagun-ek Iurreta lagun

2011-02-03T21:51:00.008+01:00

Azaroan udalarekin elkarlanean hasi eta abian jartzeko lanak egin ondoren, martxan hasi da Iurretan Berbalagun egitasmoa. Euskaraz elkarren artean, elkarren ondoan eta elkarri egiteko asmoz batu dira lehenengoz aste honetan Iurretako berbalagun berriak.

Euskara hobetu eta lotsa barik kalean erabiltzeko aukera ematen duen Berbalagun gureak hazia jarri du, beraz, Iurretan ere. Hazia erne, garatu eta loratu artean, egitasmoa eta euskara zaintzen jarraituko dugu guk. Egon seguru!

Aitte San Migel Ijorretako

zeru altuko loria

agure zaharrak jantzan ikusi-ta

harek eitten jok barria.

LASTER. Auzorik auzo

2011-01-27T23:30:00.003+01:00

Domekan, hilak 31, Auzorik Auzo ibilaldia izango da Abadiñon. Hamabi Harri auzo-elkarteak antolatzen duen jarduera honek VI. edizioa beteko du domekan. Oinez egiten den martxa honen helburua xumea bezain aberasgarria da: Abadiñoko auzoak ezagutzea, ibilaldiaz gozatuz.

Goizeko 8,30etan Gerediagako plazan egingo den sinatze-ekitaldiak emango dio hasiera Auzorik Auzo ekimenari. Ordu erdi geroago, 9etan, 20 km. inguruko ibilbideari ekingo diote parte hartzaileek. Parte hartzaileen indarrak berreskuratzeko, gune bi egokitu dituzte antolatzaileek: Gaztelua auzoan fruta banatuko dute, eta 10,30etatik aurrera salda egongo da Irazola auzora heltzen direnentzat.

Ibilaldia amaitutakoan, Zelaietako kultur-etxean luntxa egongo da erromeriaz alaituta. Ezetz topatu plan ederragorik!

KORRIKA 17. Euskalakari

2011-01-20T20:58:00.003+01:00

Maitatu,
ikasi,
ari
...
EUSKALAKARI!

LASTER. Kantulagun

2011-01-19T18:00:00.007+01:00

Bihar, hilak 20, iluntzeko 8etan abiatuko da Berbaro euskara-elkarteak eta Plateruena kafe-antzokiak antolatutako Kantulagun ekimena. Kantulagun-i esker Durangaldeko euskaltzaleok, lagun arteko giroan, kantuaz gozatzeko aukera paregabea izango dugu. Bizkaiko kantak izango dira, besteak beste, landuko diren kantak.

Esan bezala, Kantulagun bihar abiatuko da, eta maiatzera arte izango du iraupena. Otsailaren 24an, martxoaren 24an eta apirilaren 28an izango dira hurrengo saioak, eta maiatzaren 27an kantu-afari batek emango dio amaiera ekimen polit honi. Kantulagun-en saio bakoitzak kantari, musikari edo letragile ezagun bat izango du gidari. Biharko saioak, esaterako, Xabier Amuriza.

Euskal kantei ekiteko gogoaz bazabiltza, bada, Plateruena kafe-antzokiko barran izena eman baino ez duzu egin behar.

info

BERBALAGUNAK. Estelle

2011-01-13T22:43:00.007+01:00

Argazkiko eskiatzailea Estelle Guillaume da. Estelle Suitzako mendietan, bere jaioterriko mendietan. Ederto aprobetxatu ditu, bai, Estellek Gabonetako oporrak. Bai, baiezkoan nago. Eta enbidia apur bat ematen du, ezta?

Estelle Durangoko berbalaguna da. 2004. urtean Durangora etorri zen gaztelania hobeto ikasi nahi zuelako eta, gaztelania ez ezik, euskara ere lantzen hasi zen. Berbalagun-en, berbalagunkide guztion moduan, euskara lanzen saiatzen da. Gainera, bizkaiera apur bat ere ikasi omen du berbataldean.

Estellek kontatu digunez, ama Erresuma Batukoa da eta aita Suitzakoa; eta bizi, Ginebra ondoan bizi izan da urteetan, baita Beirut-en ere. Alemaniara ere alemaniera hobetzera joana da. BAINA Estelleri bere ama-hizkuntza zein den (diren) kontatzea ahaztu zaio eta guk orain jakinmina daukagu (frantzesa ote? ala inglesa? ala biak? ala besteren bat, akaso?). Beno, Estelle, argitu egin beharko diguzu afera hau, bakean lo egin dezagun.

Zein zaletasun dituen kontatzea ere ahaztu zaio gure Estelleri, baina, bera apurtxo bat ezagututa, antzematen erraza dela esan genezake: hizkuntzak, bidaiak, eskiatzea... eta irakurtzea, agian?

BERRIRO ERE ZUEKIN

2011-01-10T23:15:00.004+01:00

Gabonetako oporraldia amaitu da eta zuekin gaude berriro ere, gorputza eta arima bizkortuta. Aurrerantzean, orain arteko moduan, berbalagunok osatzen dugun "familia handia" izango du blog xume honek hizpide, oinarri eta ardatz.

Beno, lagunok, gero arte. Eta baten batek esaten duen moduan: "Honekin edo harekin, baina egin".

BERBATALDEAK. Sariaz gozatzen

2010-12-20T22:41:00.009+01:00

Ezkerretik eskumara, aurrealdean jarrita, Nerea, Angel, Eva, Ismael eta Ana daude; atzean Jose dago; eta zutik -eskuman- Jose Inazio. Berbalagun hauek maiatzean berbalagun guztien artean egin zen kultur-lehiaketa irabazi zuten eta azaroaren 27an saria disfrutatzera, hau da, Plateruena Kafe Antzokira bazkaltzera joan ziren. Jose Inaziok diñoskunez, Laurak eta Josefinak osatzen dute berbataldea, baina ez zuten afarira joaterik izan.

Angelek eta Jose Inaziok menuaren xehetasunak eman gura izan dizkigute, baina ez batak ez besteak, ez dute menua zehatz-mehatz gogoratzen. Dena den, bapo bazkaldu zutela eta zerbitzaria (singularrean) oso jatorra zela baieztatu digu Angelek. Jakin ahal izan dugunez, Kafe Antzokiko ospakizun hau ez da berbatalde honek aurten egin duen ospakizun bakarra, beste afari bi gehiago ere egin baitituzte, dagoeneko.

EGUNOKAZ. Antonio Basagoiti Euskaltzaindiaren egoitzan

2010-12-15T21:00:00.008+01:00

No comment!

LASTER. Gabonetako afaria

2010-12-14T00:29:00.007+01:00

Barikuan, hilak 17, Berbaroren txokoan euskara-ikasleok eta berbalagunok sasoi honetan ohikoa den afaria egingo dugu. Aurtengoa kantu-afaria izango da eta denok izango dugu abesteko nahi beste aukera. Trikitixa ere izango dugu lagun afalaurreko poteoa bitartean.

Trikiti-poteoa egin, jateko gozoa dastatu eta euskal kantei ekiteaz gain, bestelako helburu batzuk ere betetzen ditu Gabonetako afari honek; berbalagunok eta euskara-ikasleok elkar ezagutzea eta harremanetan jartzea, besteak beste.

Beraz, ez iezaiozu ezetzik esan, ikaskide edo berbalagunkide hori, urteari amaiera ona emateko daukazun eskaintza honi. Dei ezazu lehenbailehen Berbalagun-en telefonora eta eman ezazu izena.

BERBATALDEAK. Igerilekuan

2010-12-10T20:02:00.007+01:00

"Ez daukagu beti zertan tabernan geratu; beste nonbaiten ere bil gaitezke... eta datorren astean igerilekuan batzen bagara...?" Esan eta egin. Horrelaxe egin zuten Durangoko berbataldekide hauek. Eta gure lagunen aurpegi irribarretsuak ikusita, bete-betean asmatu zutela pentsa dezakegu. Bai horixe!

Igerilekuko ur beroak eragindako lurrunez inguratuta ageri da gure "sirena-taldea" argazkian. Maite taldekidea ere bertan egon zen, baina berari argazkilari-beharrak egitea egokitu zitzaionez... bada, lasai, Maite, beste baten harrapatuko zaitugu eta.

ikus

LASTER. Ardo-dastaketa ikastaroa

2010-12-09T21:20:00.017+01:00

Adi! Adi, Zaldibarko eta Abadiñoko berbalagunok! Zeuontzat bereziki ardo-dastaketa tallerra antolatu baitugu, ardoari buruz apur bat gehiago ikas eta jakin dezazuen. Astelehenean, hilak 13, arratsaldeko 7etan Goierriko txokoan izango duzue zaldibartarrok txanda; abadiñarrok, ordea, asteartean, hilak 14, arratsaldeko 7etan Matienako Errota Kultur Etxean.

Ikastaroan ardoek dauzkaten ezaugarriak antzematen eta bereizten, baita klimak eta lurrak ardoaren osaketan daukaten eragina ere erakutsiko digu Ana Larrañaga adituak.

Beraz, badakizue lagunok. Ardoa dastatu eta berari buruz zeozer gehiago ikasi nahi baduzue, dei ezazue lehenbailehen Berbalagun-en telefonora, izen-ematea dohainik da, baina erreserba aldez aurretik egin behar baita.

EGUNOKAZ. Xabier Lete hil da

2010-12-08T21:41:00.003+01:00

Pasa den larunbatean Donostia ospitalean zendu zen Xabier Lete, 66 urte zituela, urteetako gaixotasun larri baten ondorioz.

Xabier Lete oiartzundarrak eragin handia izan du euskal kantagintza modernoan. Ez Dok Amairu taldearen sortzaileetako bat izan zen musikari hau. Baina idazlea ere -idazle ekina, izan ere- izan da Xabier Lete eta, horregatik, kantari askok bere hitzak erabili dituzte. Euren artean, Lourdes Iriondorekin eta Antton Valverderekin, batez ere, elkarlan estuan ibilia da Xabier Lete. Bertso zaharrak berreskuratzen ere lan handia egin zuen Letek.

Xabier Letek sortutako poema eta abesti asko oso ezagunak dira, Ez dut amets haundirik, Izarren hautsa, Itsasoan urak haundi, Haizea dator ifarraldetik eta Xalbadorren heriotzean, esaterako.

LASTER. Euskal Liburu eta Disko Azoka

2010-12-01T23:14:00.011+01:00

Zapatuan zabalduko ditu Gerediaga Elkarteak Durangoko Euskal Liburu eta Disko Azokako ateak. Aurtengo edizioa 45. edizioa da eta, urteroko moduan, nobedadez josita dator aurten ere. Ondotxo dakizuenez, Euskal Herrian ekoiztutako musika eta literaturaren erakusleiho erraldoia izateaz gain, leku guztietako euskaldunen topagunea da Durangoko Azoka.

Aurtengo Argizaiola saria Imanol Urbieta musikari eta idazle emankorrak jasoko du; Imanol Urbieta pedagogoa eta musikaria da eta oso ezaguna, batez ere, umeentzako abesti ospetsu askoren egilea delako. Bestalde, aipatu ere egin behar da aurtengo Liburu eta Disko Azokaren gaia "erotismoa" dela eta herrialde gonbidatua Kurdistan.

Giro sanoan eta euskaldunean murgilduta ibiltzeko nahiko aitzakia ederra eskaintzen digu berez Liburu eta Disko Azokaren gertakizun garrantzitsu honek; baina hau gutxi balitz, Esne Beltza, Gatibu, Ken Zazpi eta Bide Ertzean musika-taldeen kontzertuak izango ditugu Plateruena Kafe Antzokian entzuteko eta ikusteko moduan.

Zapatura arte, lagunak!

info

EUSKARA-IKASLEAK. Mintzodromoa

2010-11-30T20:51:00.002+01:00

Durangon mintzodromoa eraiki dute. Bai, min-tzo-dro-mo-a! Eta ezetz asmatu non? Bada, Udal Euskaltegian, lagunak. Beno, egia esanda, eraiki, eraiki... ez dute egin behar izan. Maila eta ordutegi ezberdinetako ikasleak elkartu daitezen eta hainbat gairi buruz berba egin dezaten moldatu berri dute gune bat Udal Euskaltegikoek. Gune horretan -mintzodromoan- ikasleek elkar ezagutu eta elkarrekin euskaraz hitz egiteko aukera daukate.

Argazkian ikus ditzakezue Udal Euskaltegiko ikasleak eta irakasleak mintzodromoan. Kafetxoa eta galletak ez dira falta izan, "ez portzierto", mintzodromoaren inaugurazioan.

Urte askotarako!

BERBALAGUNAK. Isa

2010-11-29T21:15:00.003+01:00

Isa Aguilera Moyak bi urteko eskarmentua dauka Berbalagun egitasmoan eta, halere, hirugarrenari ekiteko zalantzarik ez du izan. Berrizen jendeak euskaraz berba egiten zuela konturatuta, orain dela bi urte euskaltegian eman zuen izena lehenengoz santurtziar honek. Ondoren Berbalagunen apuntatu zen. Harrezkero, 1. eta 2. mailako euskara-tituluak lortu ditu eta egun 3. mailan dihardu.

30 urteko gazte honek ingeniaritza ikasketak egin zituen Bilbon. Titulua lortuta ez ezik, gizonaz maiteminduta ere utzi zuen Isak unibertsitatea, ikasketok amaitutakoan. Gerora, Zaldibarren lana topatu zuenez, Iker bere senarrarekin etorri zen honantza. Bost urte daroaz Isak Berrizen eta dagoeneko berriztartuta dago.

Musika, zinema, txakurrarekin paseatzea eta bidaiatzea ditu gustuko Isak. Batez ere, bidaiatzea: beste kultura eta leku batzuk ezagutzea... Oporretako unerik atseginena horrela deskribatzen digu Isak: "Leku lasai eta galdu baten, autokarabana ondoan etzanda, senarra alboan dagoela, liburu on bat irakurtzen".

GOGORATU! Berbalaguneko partaide izatearen abantailak

2010-11-25T20:41:00.008+01:00

Berbalaguneko kidea izateagatik zein abantaila eta deskontu dauzkazuen gogorarazi nahi dizuegu oraingo honetan.

Berria egunkariaren asteburuetako harpidetzan deskontua. (info)
AIZU! aldizkariaren harpidetzan deskontua. (info)
UEUko (Udako Euskal Unibertsitateko) ikastaroetan deskontuak. (info)
EHUko (Euskal Herriko Unibertsitateko) aukera askeko kredituak. (info)

On dagizuela!

LASTER. Osteratxo bat Himalayan barna

2010-11-21T21:33:00.014+01:00

Ostegunean, hilak 25, iluntzeko 7,30etan Pinondo Etxean "Osteratxo bat Himalayan barna" diaporamaz gozatzeko aukera izango dugu.

Estik eta Josebak Himalayako mendietan zehar egindako "trekking"-aren ondorioa da muntaia hau. Ibilaldian izandako bizipenak, ikusitako parajeak, bisitatutako herriak eta ezagututako jendea ditu ardatz diaporama honek.

Himalaya aldea ezagutzeko abagune ezin hobea eskaintzen digu Estik eta Josebak prestatutako diaporama eder honek.

Elorrioko, Abadiñoko eta Zaldibarko herritarrak ere berba-lagun

2010-11-21T00:30:00.007+01:00

Elorrion martxan hasi ziren -gogotsu hasi ere- 6 berbatalde pasa den astean. Bihartik aurrera -Elorriokoek bezain gogotsu- Abadiñon 4 berbataldek eta Zaldibarren 3k ekingo diote aurtengo jardunaldiari.

Berbalagun egitasmoak berbataldeetan dauden hainbat euskaldun-laguntzaileren parte hartze barik ez leukakeela aurrera egiterik aipatu barik ezin dugu utzi. Doala hemendik eurengana, bada, gure eskerrona.

Bestalde, Iurreta ere Berbalaguneko atean joka dabilela esan behar dugu. Berbalagunen laster izango dugu, beraz, iurretarren berri.

LASTER. Euskal zinema

2010-11-18T21:20:00.005+01:00

Azaroaren 22tik abenduaren 2ra, Berrizko Kultur Etxean, Euskal zinema ikusgai. Hona hemen egitaraua:

- Azaroaren 22an, 19:00etan: Zorion perfektua

- Azaroaren 23an, 19:00etan: Itsasoaren alaba

- Azaroaren 24an, 19:00etan: 80 egunean

- Azaroaren 25ean, 19:00etan: Palabras que vienen del mar

- Azaroaren 26an, 20:00etan: Ander

- Azaroaren 28an, 19:00etan: Izarren argia

- Azaroaren 29an, 19:00etan: Sagarren denbora

- Azaroaren 30ean, 19:00etan: La máquina de pintar nubes

- Abenduaren 1ean, 19:00etan: Checkpoint rock

- Abenduaren 2an, 19:00etan: Querida Bamako

www.berriz.org

EUSKARA-IKASLEAK. San Martin kiniela

2010-11-15T21:59:00.005+01:00

Atzo jaso zuten saria "San Martin kiniela"ko asmatzaileek. AEK-k urtero ikasleen artean zabaltzen duen galdetegia da "San Martin kiniela". Txarrien eta txarriboden gainean gehien dakienak neguari aurre egiteko besteko otzara ederra irabazteko aukera izaten du. Izan ere, jakin ahal izan dugunez, txarrikiez gain, Tolosako zigarroak eta Gorrotxategiren turroiak ere ez dira falta izan aurtengo otzaran.

Argazkian, sarien ondoan, irabazleetako bat ageri da bere taldekideekin batera. On dagiela!

LASTER. Xabier Amurizarekin solasaldia

2010-11-12T18:56:00.017+01:00

Asteazkenean, hilak 17, goizeko 10etan Durangoko udal liburutegian aukera ezin hobea izango dugu literaturaren munduan murgiltzeko Xabier Amurizaren eskutik.

Bertsolari eta idazle handi hau hobeto ezagutzeko parada edukiko dugu, hortaz, asteazken goizean udal liburutegira hurreratu ahal garen guztiok. Xabierrek, gainera, "Euskara batuaren bigarren jaiotza" liburuari buruz berba egingo digu.

Berrizko berbalagunak prest

2010-11-12T17:17:00.007+01:00

Atzo izan zen Berrizen Berbalagun egitasmoaren aurkezpen-batzarra. "Anbulatorio zaharrean" izan zen batzarra, eta oso giro atsegina egon zen (berbalagun batzuen umeek zerikusi handia izan zuten horretan). Astelehenean ekingo diote Berrizko berbalagunek aurtengo jardunaldiari.

Aurtengo berbalagun bat gorra dela ere ezin da aipatu barik utzi. Hori da meritoa, hori, Gorettik daukana!

Durangoko berbalagunak euskararekin bat

2010-11-05T22:32:00.005+01:00

Hainbat berbalagunkide batu ziren atzo Pinondo Etxean izandako aurkezpen-ekitaldian. Bertan, egitasmoaren gaineko xehetasunak jasotzeaz gain, berbataldeen osaketa eta taldekideak ezagutu ahal izan zituzten. Berbalaguneko parte hartzaileek gogor ekingo diote, astelehenetik aurrera, euskaraz egiteko eta zabaltzeko konpromisoari.

Hasi, 12 berbatalde hasiko badira ere, oraindik izena emateko aukera dagoenez, baliteke berbataldeen kopurua handitzea.

Nor ote da?

2010-10-28T22:18:00.004+01:00

Hementxe dugu Ziortza, Berbalagun egitasmoaren arduradun berria. Berarengan ohikoa denez, ingurua aztertuz ... iluntasunetik argia bilatuz... Hau da gure mintza-praktika programa hau kudeatuko duena, berbalagunak harremanetan paratuko dituena eta berbataldeak babestuko dituena. Ilunpetik, batzuetan... argitan, besteetan. Enfin! Hau da arduradun berria!

Aurkezpen-batzarra Durangon

2010-10-28T17:03:00.003+01:00

Ostegunean, azaroak 4, iluntzeko 7,30etan Berbalagun egitasmoaren aurkezpen-batzarra izango da Pinondo Etxean. Bertan programari buruzko informazio zehatzagoa emango da. Halaber, berbataldeen aurkezpena ere egingo da.

Proiektuan izena emanda daudenez gain, interesa edo jakinmina duen oro etor daiteke batzar honetara eta ongi etorria izango da.

Durangaldeko BERBALAGUN, abian

2010-10-28T15:55:00.006+01:00

"Atera arbela kalera" lemapean, ondoko egunetan emango dio hasiera AEK-k aurtengo ekitaldiari.

Aurten Durangoko Merinaldearen Amankomunazgoa osatzen duten herri guztietako biztanleek parte hartzeko aukera izango dute Berbalagun egitasmoan; dohainik, gainera. Horrela, bada, Elorrion, Zaldibarren, Berrizen, Durangon eta Abadiñon ez eze, Atxondon, Izurtzan, Mañarian eta Iurretan ere, herrian bertan, partu hartu ahal izango da Berbalagun mintza-praktika programan. Udalerri hauetako euskara-zerbitzuak, euskara-elkarteak, euskaltegiak, Hizkuntza Eskola eta Durangoko Merinaldearen Amankomunazgoa dira programa honen sustatzaileak.

BERBALAGUN ARGAZKIAK

2010-07-16T09:25:00.005+01:00

Aurten Durangaldeko berbalagunetan ibilitakoen lekukoa!!

Irailean ere berriz elkar ikusiko dugulakoan jaso ezazue agurrik beroena durangaldeko egitasmoetan ibili garen dinamizatzaileon aldetik!!!

DIAPORAMA ELORRION

2010-07-16T09:12:00.003+01:00

Durangoko Merinaldearen Amankomunazgoaren babesarekin eta Elorrixoko euskara zerbitzuarekin elkarlanean, diaporama emanaldi interesgarri bat izan genuen Elorrion ekainaren 3an.

Iturri kultur etxean, Himalayan zehar egindako bidaia baten gorabeherak ezagutzeko aukera izan genuen Estiren eskutik.

20-30 lagun bildu ginen bertan, tartean, berbalagunak, euskara ikasleak eta herritarrak. Batek baino gehiagok uda parteko oporrak antolatzeko ere aprobetxatu zuen ekitaldi hau!

Berbalagun azken bazkaria

2010-07-16T08:39:00.007+01:00

Durangaldeko Berbalagunek Ekainaren 19an egin genuen jaitxoarekin eta plateruenean egin genuen bazkari oparo batekin eman genion aurtengo edizioari bukaera.
Durangoko kaleak "dangiliske" taldearekin alaitzen ibili ondoren-dultzainak, soinua,...- durangaldean talde ezberdinetan ari garen berbalagunak plateruena kafe antzokiara abiatu ginen. Bazkaldu ondoren, kantaldia ere izan genuen.

Hala ere, honekin dena ez da bukatu eta berbalagun taldeetan ere afaritxoak, etab..prestatu zituzten ekainean zehar oporraldia ondo baino hobeto hasteko eta iraila-urrirako itzulia gogotsu hartzeko.
Hona hemen jaitxoaren lekuko rgazki bilduma…

DURANGALDEKO BERBALAGUN BAZKARIA

2010-06-07T10:39:00.002+01:00

DURANGALDEKO BERBALAGUNAK

Berbalagunak Ekainaren 19an plateruenean egingo dugun bazkari oparo batekin emango diogu bukaera aurtengo edizioari . Hala ere, dena ez da bukatu eta berbalgun taldeetan ere afaritxoak, etab..prestatu dituzte ekainean zehar oporraldia ondo baino hobeto hasteko eta irailerako itzulia gogotsu hartzeko.

Izena emateko azken eguna ekainaren 15a izango da. Dagoeneko berbalagunak izena ematen hasi dira.

ZABALA da; berbalagun, ikasle, irakasle, lagun, euskaltzale,burkide,maitale,auzokide, amona.......euskaraz aritzeko gogue besterik ez da biher!

DIAPORAMA ELORRION

2010-05-28T11:49:00.003+01:00

DURANGALDEKO BERBALAGUNAK
ANTOLATUTAKO EMANALDIA

Durangaldeko berbalagunak amankomunazgoaren babesarekin eta Elorrioko euskara zerbitzuarekin elkarlanean, diaporama-hitzaldi bat antolatu du Elorrion, datorren ekainaren 3an.
Bertan Estik Himalayan bizi izandako esperientzia interesgarria kontatuko digu.

Danok zaudete gonbidatuta!!

MINTZA EGUNA ARRASATEN

2010-05-20T18:51:00.003+01:00

DURANGALDEKO MENUAK ELORRIO

2010-05-20T17:16:00.003+01:00

Antzerkia Elorrixoko Arriola Aretoan
"XABINEITOR superheroi euskalduna"

Datorren ostiralean Elorrion izango dugu Gorringo antzerki taldeak eskeintzen digun antzaslanerako gonbitea egin nahi diegu Durangaldeko berbalagunei.

Berba egin, lan egin, oparitu, jolastu, gozatu, barre egin, maitatu, dantzatu...euskaraz!!!

DURANGALDEKO MENUAK BERRIZ

2010-05-20T17:14:00.001+01:00

Berrizen ere adin guztietarako ikuskizunak
euskaraz bizi!

DURANGALDEKO MENUAK ZALDIBAR

2010-05-20T17:11:00.002+01:00

Zaldibarren antolatutakoak hile hauetan

DURANGALDEKO MENUAK DURANGO

2010-05-20T17:00:00.004+01:00

Hona hemen Durangon antolatutako hainbat ekitaldi interesgarri, gainean klikatu eta bertatik bertara ikusi ahal izango dituzu...Ekainerako San Agustin kultur gunean izango ditugun ikuskizunak.
Berbalagun eta euskara ikasleentzat prezio bereziak.

Parte hartu! eta gozatu euskaraz!!

DURANGALDEKO MENUAK ABADIÑO

2010-05-20T16:47:00.004+01:00

Bidaiei buruzko programa Abadiñon

Herrialde exotikoak eta bidaiatzeko moduak

Guztira, erakusketa bat eta zortzi hitzaldi izango dira maiatza eta ekainean Errota eta Txanportako kultura-etxeetan

Familiakoekin batera Europan barrena bizikletan ibilaldi bat egitea, Irango exotismoa eta merke bidaiatzeko trikimailu batzuk…, horra hor Abadiñoko Udalak maiatz eta ekainean Txanporta eta Errotako kultura-etxeetan antolatu duen bidaiei buruzko programako hitzaldi batzuen ardatza.

Bidaiatu TAN TAN TAN! (Bidaiatu egueneTAN zazpieTAN Kultur EtxeeTAN)". Horren bidez, bidaietan izandako hainbat bizipenen berri eman nahi zaie herritarrei, beste lur batzuk ezagutu ditzaten eta munduan barrena egin nahi dituzten ibilaldiak hobeto hautatu ditzaten. Guztira, zortzi hitzaldi eta proiekzio izango dira. Horien bidez, Abadiñoko herritarrek eta Euskal Herriko beste toki batzuetako bidaiariek beste lurralde batzuetan izandako bizipenen berri emango dute.

Programa maiatzaren 6an hasiko da: Donostiako familia bateko kideek –Mikel Bringas-ek, Rosa Lizasok eta Eki eta Lur seme-alabek– Europako hainbat herrialdetatik bizikletaz egindako ibilaldia kontatuko dute. Maiatzaren 13an, Asier Aranzabal eta Mila Gallastegi zornotzarrek klixeetatik ateratzen den herri batean izandako bizipenak azalduko dizkigute: Irango bizipenak.

Maiatzaren 20an, Mertxe Bilbao bilbotarrak gomendioak emango ditu munduan barrena diru gutxirekin ibili ahal izateko; eta, hurrengo ostegunean, Maite Blanco elorriarrak eta Aitor Huici iruindarrak Txinan izandako bizipenak kontatuko dituzte.

Ekaineko saioak ekainaren 3an hasiko dira, eta, horrenbestez, Bruselako Alice Goffart-ek eta Andoni Rodelgo eibartarrak mundu osoan barrena hiru urtez bizikletan egindako bidaiaren berri emango dute.

Astebete geroago, Eneko Espino gasteiztarrak eta Oscar Martinez abadiñarrak Maliri buruz hitz egingo dute; eta, ekainaren 17an, Amaia Ardanza abadiñarrak Indian eta Nepalen izandako bizipenak azalduko ditu. Azkenik, maiatzaren 24an, Amaia Huarte abadiñarrak bere herritik Norvegiaraino furgonetaz egindako ibilaldia kontatuko du.
Ekainean, Udalak erakusketa bat antolatuko du, parte-hartzaile guztien bidaietako argazkiak bilduta.

Informazio gehiago nahi izanez gero klikatu hemen.

MINTZA EGUNA

2010-05-20T16:15:00.004+01:00

Berbalagun eguna edo Mintza eguna ARRASATEn

Euskaraz gozatzeko, ondo pasatzeko, beste herrietako edo egitasmoetako berbalagunak ezagutzeko eguna dugu hau.

Proiektu honetan parte hartzen dugun guztiontzako omenaldia eta saria.

Aurten Arrasaten izango da, eta bertako kaleak berbalagunez betetzea espero dugu, zorionez, gero eta berbalagun gehiago baitago.

Durangaldeko Berbalagunak AUTOBUSA JARRIKO DUGU joan nahi duzuen guztiontzat. Autobuserako, izena eman besterik ez da egin behar, Durangaldeko Amankomunazgoak diruz laguntzen baitu.

Goizeko 9:30ean Zaldibarren, Berrizen 9:45an, Durango10:00etan Madalenako autobus geltokian, Abadiñon 10:15etan, Zelaietan eta Elorrixon 10:30ean Interren.

Mintza eguneko egitaraua honako hau duzue:

11:00etan Ongi etorria berbalagun guztioi eta hamaiketakoa denontzat plazan.

12:00etan Ibilaldi gidatua Arrasatetik

13:30etan Kalejira ( berbalagun guztiok dantzan herria zeharkatuko duen kalejiran)

14:30etan Bazkaria herriko plaza nagusian (20 eurotan)

15:30etan Sari banaketa berezia

16:00etan Erromeria KATAIA taldearekin

Autobusean izena emateko azken eguna maiatzaren 28an bukatuko da. Bazkari txartelak nahi dituenak lehenebailehen bidali mezu bat berbalagun helbidera durangaldea@aek.org edo deitu 639400786 zenbakira.

Gogoratu! bazkaria : 20 euro

Izena emateko:
Durangaldeko AEK euskaltegietan edo 946817349
Durangoko Udal euskaltegian 946030040
Berbaro euskara elkartean 946201918
Durangoko euskara zerbitzuan 946030016

Izena ematearekin batera idatzi/eman telefonoa

NAFARROAN EUSKARAZ BIZITZEKO ESKUBIDEA

2010-05-13T09:34:00.004+01:00

Nafarroako euskalgintzak, maiatzaren 15ean Iruñean egingo den
manifestaziora deitu du. Euskarak Nafarroan bizi duen egoerarekin
kezkatuta eta Nafarroako Gobernuak euskararekiko duen kontrako
jarrera salatzeko.
Durangotik Berbaro euskara elkarteak autobusa antolatu du
Iruñeara joateko. Durangaldeko berbalagun dinamizatzaileok,
berbalagun taldeetan ari diren kideei, euskara ikasleei, euskaldun zaharrei,..
bertan parte hartzeko gonbitea egin nahi diegu.

SAGARDOTEGIA

2010-03-04T18:14:00.004+01:00

Larunbatean Durangaldeko Berbalagunak sagardotegira goaz!!

Durangaldeko AEK, Durangoko Udal Euskaltegia eta Hizkuntza Eskolako ikasleak,
Berbaro elkarteko lagunak, berbalagunak, bidelariak zein bidelagunak...

Azkenean autobus bi bete joango gara Usurbilgo Aginaga auzoan dagoen
URDAIRA sagardotegira.
Arratsaldeko 4:30ean irten, geldialdi bat Getaria edo Zarautzen
eta gero zuzenean bertako sagardo , txuletoi paregabea, makailu
tortila, intxaurrak eta gazta menbriloarekin dastatzera.
Gure trikitilariek ere giro ederra sortuko dutela ez dago zalantzarik!!
Ondo ibili danok eta ea argazkiak ikusteko modukoak ateratzen ditugun...

2010-02-12T16:41:00.000+01:00

ABADIÑON AUZORIK AUZO!!

2010-02-04T12:37:00.003+01:00

Aurreko igandean Abadiñon AUZORIK AUZO ibilaldia egiteko gonbitea jaso genuen Durangaldeko Berbalagunok. Taldez talde, dinamizatzaileok informazioa pasatzen ibili baginen ere, azkenean eguraldi kaskarra zela eta ziur gaude batek baino gehiagok iganderako planak aldatu zenituztela. Hurrengo batean izango da!!

Durangaldeko Berbalagun dinamizatzen ari garenon aldetik eskerrak eman nahi dizkiegu antolatzaileei bertaratzeko gonbidapena luzatu zigutelako eta ea hurrengoan eguraldi hoberik dugun!

Martxoaren 6an SAGARDOTEGIRA GOAZ!!!

2010-02-04T12:26:00.006+01:00

Durangaldeko berbalagunak, euskara ikasle zein euskaltzaleak,…ADI!!
Martxoaren 6rako jarri dugu hitzordua. Gipuzkoa aldeko sagardotegiren batera txangoa prestatzen ari bagara ere, izena eman daiteke jada!

Tokia, dirua eta bestelakoak lotzen ditugunean kartelez josiko dugu Durangaldea.
Hala ere, ez itxaron eta eman zure izena!!

Izena emateko tokiak:
Durangaldeko Berbalagun: Durangaldea@aek.org edo 639400786
Berbaro Euskara elkartea 946201918
Durangoko Udal Euskaltegia 946030040
Durangaldeko AEK euskaltegiak, Durangoko Abarrak, Elorrioko Abizari , Berriz, Abadiño eta Zaldibar. 946817349 edo 946582111
Durangoko euskara zerbitzua 946030016

TXITXIBURDUNTZI EGUNA Otsailaren 7an

2010-02-04T12:09:00.003+01:00

Inauteriak gainera datoz eta horrekin batera, Txitxiburduntzi Eguna ere hemen da. .

Txitxiburduntzi, Kanporamartxo, Sasimartxo, basokoipetsu, Kanpamartxo, Txitxiburruntzi, Sasikoipetsu, Basatoste etab... Herririk herri izen propioarekin.
Garizuna aurretik egiten den ospakizuna da eta tradizio hau gure inguruko hainbat herritan bizirik dago. Herrietako jendea basora abiatzen da burduntzian erretako txorixo eta enparauak jatera.

Durangaldean Elorrion, Zaldibarren, Durangon,Abadiñon, Berrizen,… ospatuko da. Hainbat elkarte edo udalek antolatutakoak zein norberak kuadrilan, familian,..ospatuko dituenak.

Adibide modura Durangon antolatu dena:

Txitxiburduntzi 2010

alpino tabira mendizale elkarteak

antolatuta

Ibilbidea: Andra Mari - Santa Lucia - Landaeder
Irteera, Andra Marin goizeko 9 etan.
Alpinok sua eta edariak jarriko ditu, norberak gogoa eta txorizoa.

Zu ere zeren zain zaude? Bada, hartu txorizo-korda eta abiatu zaitez zure berbalagun, bikote, guraso, ume edo lagunekin basora! ON EGIN!

(txitxiburduntzi eguneko argazkiak, komentarioak,.. blogean argitaratu nahi badituzue, bidali helbide honetara durangaldea@aek.org)

ABADIÑOKO BERBALAGUN TALDEAK HASI DIRA DAGOENEKO

2010-02-04T12:04:00.001+01:00

Azaro eta abenduan izen emate kanpaina egin eta martxan jarri dira jada Berbalagunak Abadiñon. 35 lagunek baino gehiagok eman du izena eta 5 berbatalde sortu dira herrian. ANIMO ZUEK!!!

Gogoratu, berbalagun egitasmoetan parte hartzeko aukera oraindik ere badagoela.
Hona hemen ABADIÑOKO BERBALAGUN TALDEAK:
Astelehenetan iluntzean, 20:00-21:00: Irlandesean(Matiena)
Astearteetan eguerdi aldean, 15:00-16:00: Soloanean(Zelaieta)
Arratsaldean, 17:00-18:00: Errotan(Matienan)-momentuz lekua aukeratu arte.
Asteazkenetan goizean, 10:00-11:00: Atsegin tabernan(Matiena)
Ostiraletan eguerdi aldean, 15:00-16:00: Errotan(Matiena)- momentuz lekua aukeratu arte.

ANTZERKIA Durangoko SAN AGUSTIN Kultur gunean

2010-02-04T11:56:00.002+01:00

XABINEITOR

"Xabineitor superheroi euskalduna”

Datorren igandean Durangon izango dugu GORRINGO ANTZERKI TALDEAk eskaintzen duen antzezlanerako gonbitea jaso dugu Berbalagunok. Berbalagun egitasmoren batean parte hartzen baduzu edo euskaltegietako ikaslea bazara %50eko deskontua izango duzu. Sarrerak hartzean zein berbalagunetan edota euskaltegitan zabiltzan esatearekin nahikoa da.

Animo eta gozatu antzeslan honekin!! Berba egin, lan egin, oparitu, jolastu, gozatu, barre egin , maitatu, , dantzatu,….. euskaraz!!!

2010-02-03T09:34:00.002+01:00

SAN BLASAK ABADIÑON!!

“Abañon bazkaldute Urkiolan gora….”
“Abadiño San Blasetan, Abadiño San Blasetan, neska zaharrak bentanetan, neska zaharrak bentanetan, mutil zaharrak engainetan..ieupalaa!!

Abadiñokoak San Blasak ospatzen hasiak badira ere, otsailaren 3an Berbalagunak ere bertan egongo gara ferixie ikusi, taloa txorizoaz jan eta mingaina astintzen euskaraz.

San blasetako egitarau majoa hemen klikatuta ikusteko aukera izango duzue.

Aurtengo edizioan abadiñoko kultura sailak, bertan, eguneko argazki lehiaketan parte hartzeko aukera zabaldu du. Beraz, argazki dexenterik edo baduzue, bidali bertara.

Abenduaren 18an

2010-02-03T09:15:00.014+01:00

URTE AMAIERAKO JAIA Durangon

Berbaro euskara elkartearen txokoan batu ginen Durango eta inguruko berbalagun, euskara ikasle, irakasle eta euskaltzaleak.

Aurretik Goienkalen sabelak berotu, mingainak astindu eta giro ezin hobean aritu ginen. Berbatalde ezberdinetako partaideak elkar ezagutzeko parada izan zuten .

Afaldu ondoren Abarkas eta Lazkano bertsolariak aritu ziren, puntuka baino “puntaka”. Bertakoen barre algarak ez ziren makalak izan ba! Hauek saiotxoa amaitu ondoren kantu papera eskuetan hartu eta jo ta su eztarria astintzeari eman genion…a zer nolako euri jasa hurrengo egunean!

Urteari benetan amaiera polita eman genion Durangaldeko BERBALAGUNEK!!

AEK eta UPV-EHUren arteko HITZARMENA

2009-12-21T18:28:00.003+01:00

AEKren mintzapraktika egitasmoetan (berbalagun, mintzalagun...) parte
hartzen duten Euskal Herriko Unibertsitateko
ikasleek aukera askeko kredituak eskuratu
ahal izango dituzte. Adostutakoa honakoa da:

* Unibertsitateko ikasleen zeregina: mintzapraktika egitasmoan dauden
euskaldun berriekin astean ordu batez elkartzea eta euskara ikasleak
ikas-prozesua amaitzen laguntzea. Egitasmo hauek mintzataldeetan antolatzen
da, unibertsitateko ikasleak bertan integratuko lirateke eta laguntzaile
papera beteko lukete. Orotara 45 ordu, hau da, 3 kreditu

* Euskal Herriko Unibertsitateak parte hartzen duten ikasleei euren
espediente akademikoko aukera askeko kredituak lortzeko aukera emango
lizkieke..

* AEKren Praktika Zerbitzua berriz, ikasle horien jarraipena eta
ebaluazio txostena egiteaz arduratuko litzateke.

Izena eman edo informazio gehiago nahi izanez gero, bete fitxa haueta zurekin
jarriko gara harremanetan.

Berbalagunentzat eskaintza BERRIA

2009-12-14T17:15:00.005+01:00

Mintzapraktika egitasmoetako partaidea bazara(berbalaguna, mintzalaguna,..)
AEK-k BERRIArekin duen ekordioari esker, asteburuetan zure kioskoan %50 merkeago jaso dezakezu egunkaria.
Horretarako zure datuak bete hemen eta kioskoaren izena eta helbidea idatzi. Datuok konprobatzeko jarri zein egitasmotan parte hartzen duzun.

Durangaldeko Berbalagunak!!

DENOK EGUNKARIAREKIN BAT!!

2009-12-14T17:10:00.003+01:00

ELORRIO

2009-12-11T18:33:00.003+01:00

Elorrixon Berbalaguna martxan!!!
Aurtengo edizioan herriko erabilera egitasmoan parte hartzen duten
berbalagun taldeean egutegia eta ordutegia:

Astelehenetan:
15:00-16:00 Parran

Asteazkenetan:
12:00-13:00 Parran

Ostegunetan:
15:00-16:00 Portalekuan
19:00-20:00 Gurian
21:00-22:00 Tangerren

Ostiraletan:
10:00-11:00 Parran

Eman izena berbalagunen!!!

Iazko berbalagunak ardo dastaketa ikastaroan

BERRIZ

2009-12-11T18:12:00.003+01:00

Berrizko Berbalagunak martxan!!
Aurten ere berriro ekin diogu berbalagunari Berrizen.

Berbataldeen egutegia eta ordutegia:

Asteazkenetan:
16:00-17:00 Pedro Juanen

Ostegunetan
18:30-20:30 Fondan

Ostiraletan
15:00-16:00 Kantoien

Berrizko berbalagunean parte hartu nahi baduzu , oraindik ere baduzu aukera!!
Zahar eta Berri berbetan gabiz

ZALDIBAR

2009-12-11T17:53:00.004+01:00

Zaldibarko Berbalagun Taldeak

Zaldibarren Berbalagunak batzen hasiak dira dagoeneko.
Hau da bertako taldeen egutegia eta ordutegia:

Asteartean:
19:30-20:30 Rincon de Paula tabernan
Asteazkenetan:
10:30-11:30 Rincon de Paula tabernan
19:30-20:30 Rincon de Paula tabernan

Ostiraletan:
15:00-16:00 Karobi kafetegian

Animatu eta zeuk ere izena eman!!!

zaldibarko berbalagunak iazko ospakizunean

Berbalagunon jaia

2009-12-11T16:46:00.009+01:00

Kaixo berbalagun, ikasle, irakasle, euskaltzaleak!!

Urtea behar den moduan amaitzeko Durangon Durangaldeko Berbalagunak Gabonetako jaitxoa antolatu dugu hurrengo ostiralerako, hilaren 18an.
Asmoa 19:30etan trikipoteo batekin ekitea da, goienkalen gora eta behera. Ondoren, 21:00etan, afaria izango dugu Berbaroko txokoan .

Menua: Entsalada, solomoa piperrekin, postrea eta edaria ere behar beste, dena 15€tan.
Bertan bertsolariak ere izango ditugu, Gorka Lazkano eta Eneko Abasolo"abarkas".
Kantuen aritzeko aukera ere egongo da afalostean..

Beraz bi aukera dituzue, afal aurretik trikipoteoan parte hartu nahi duzuenok 19:30etan Izki tabernan(lehengo berbaro) geratuko gara eta afaltzera zuzenean etortzeko asmoa duzuenok, 21:00etan berbaroko txokoan..

Izena emateko azken eguna(beti salbuespenen bat ere egiten dugu..) 14a da.
Animatu eta izena emon!!

2009-12-03T21:02:00.004+01:00

ABADIÑON ERE BERBALAGUNA

2009-12-03T20:18:00.007+01:00

Talde banaketa, ordutegiak zehazten,....

Durangoko berbalagun taldeak:

Astelehenetan:

15:30-16:30 Jai Berri kafetegian
19:00-20:00 Plateruenan
20:30-21:30 Plateruenan

Asteartean:

15:00-16:00 Ibaizabal kafetegian

Asteazkenean:

10:00-11:00 Jai Berrin
15:00-16:00 Atxo Fun-funean

Ostegunean:

15:00-16:00 Ibaizabal kafetegian
17:00-18:00 Mesoi berrian
18:00-19:00 Ibaizabal kafetegian
18:30-19:30 Zero kafetegian

Ostiralean:

11:00-12:00 Plateruenan(2 talde)
18:00-19:00 Atxo fun funean
20:00-21:00 Irlandesean

Berbalagunak egindako batzarraren lekukotasuna.....
Oraindik ere izena emateko aukera baduzu, Eman izena Berbalagunen!!

berbalagunak azokatik...

2009-12-03T19:10:00.008+01:00

Durangoko Euskal Liburu Azokaren 44. edizioa abenduaren 4tik 8ra ospatuko da. 4an goizeko 10:30etan zabalduko ditu ateak azokak.
Durangoko berbalagunak bertaratzeko asmoa badute behintzat. Bariku goizeko taldeek 11etan hitzordua dute kafe antzokian asmo horrekin.
Egun hauetan Durango osora hamaika aukera zabalduko dira; ikuskizunak, antzerkiak, aurkezpenak, kantaldiak, elkarteratzeak,...Landako gunean, Haur literatur aretoa, Elkartegia, San Agustin, Gaztetxean azoka alternatiboa, Andra mariko elizpea, merkatu plazan artisautza azoka,...Egitarau ofizialari buruz gehiago jakiteko hemen klikatu dezakezue.

KORRIKA denda ere badagoela enteratu gara. Gainera merkealdietan ei dago eta non eta GOIENKALEN! Bertaratu behar...

Asteburu luze honetan euskararen munduan murgiltzeko aukera paregabea duzue berbalagun kideok, bertara hurbildu eta kriston pare pasatzeko!

Ondo ibili!!!

2009-12-03T11:05:00.005+01:00

BERBALAGUN PRENTSAURREA DURANGON

Iazko balantzea egin eta aurtengo edizioari hasiera emateko Durangoko talde eragileko partaideek prentsaurrea burutu genuen urriaren bukaeran Durangoko Kafe antzokian.

Bertan Berbalagun dinamizatzaileak, Hizkuntza eskolako ordezkariak, Berbaro Durangoko euskara elkarteko zuzendariak, Udal euskaltegiko zuzendariak, udaleko euskara zerbitzuko ordezkariak eta Abarrak AEK euskaltegiko arduradunak parte hartu zuten. Honetaz gain, berbalagunean ibilitakoa eta dabilen Josep ere izan genuen-jatorriz kataluinakoa, Durangon bizi dena eta azken urteetan euskara ikasi eta erabiltzen duen gaztea- eta berbalagunean parte hartzen duenetik izandako esperientzia kontatu zigun.

Honekin batera aurtengo erronkak ere plazaratu genituen eta deialdi berezia egin genien euskaldun zaharrei programan laguntzaile gisa parte hartzeko eta euskaldun berriei zein bidea egiten ari direnei programara hurbiltzeko. Animo zuek!

ZAHAR ETA BARRI BERBETAN GABIZ!!

2009-10-23T09:20:00.003+01:00

Durangaldean euskaraz

berbalagun bidez

“Zahar eta barri berbetan gabiz”

Euskara Praktikatu Durangaldean
Zabalik da Berbalagun-mintzapraktika programetan parte hartu nahi dutenek izena emateko epea

Euskara praktikatu nahi baduzu orain ez dago aitzakiarik, Durangaldeko berbalagun egitasmoak berriro martxan daude, doakoak dira, zure partehartzea da behar den gauza bakarra, astean behin elkartu, ekintzetan parte hartu, zure esku dago aukeratzea.
“Zahar eta barri, berbetan gabiz”. Hauxe da berbalagun egitasmoaren xede nagusia Durangaldean.

Aurten Durangaldeko euskararen eragileok inoiz baino indartsuago den berbalagun programak martxan jarriko ditugu hainbat herritan, parte hartzera dei egiten duen kanpaina berriaren “Eskuko atzamarrak ere ez dira igualak” lemapean.

Durangoko, Elorrioko, Zaldibarko, Berrizko eta Abadiñoko Euskara Zerbitzuak, Herrietako euskara elkarteak(Berbaro,..), Durangaldeko AEK, Durangoko Udal Euskaltegia eta hizkuntza eskola dira egitasmo honen sustatzaileak.

Durango, Berriz, Elorrio eta Zaldibarren berbalagun egitasmoan izena emoteko kanpaina martxan dago jada eta eskualdeko beste herrietara ere zabaltzeko erronka beregain hartu du AEK-k, Abadiñon azarotik aurrera zabalduko da izen ematea. Izan ere, eskualdeko udalerrietan bertako erakunde eta eragileak, bai Durangaldeko AEK-k, Udalek, Euskara Elkarteek eta Durangoko Udal Euskaltegiak zein Hizkuntza Eskola euskararen erabilera kalean sustatzeko lanetan ari dira aspaldi, buru belarri ari dira zahar eta barri euskaraz berbetan aritzeko helburuarekin. Euskararen normalkuntza prozesuan denon ahalegina eta ekarpenak beharrezkoak baitira. Alde horretatik laster Durangoko amankomunazgoa osatzen duten beste udalerrien inplikazioa ere lortzea espero dugu.

Euskararen erabilpenerako egitasmoa da berbalagun, euskaldun zahar eta berriak harremanetan jartzen dituen proiektua, edozeinek har dezake parte, berdin dio euskaldun zaharra, euskaltegiko ikasle ohia edo euskaltegiko ikaslea bada. Berdin dio zein den bere jatorria, adina, lanbidea edo zeintzuk bere zaletasunak.

berbalagunen helburuak, Durangaldeko herrietan erabilera esparruak zabaltzea, euskaldunok elkar ezagutzea eta euskara ikasten ari diren edo ibili diren ikasleek praktikatzeko aukera gehiago izatea dira. Horretarako ekimen nagusi bi antolatuko dira; berbataldeak eta euskararen agenda.

*Berbataldeak: Taldeen edota bikoteen topaketak dira. Adina, zaletasunak, eta disponibilitatea kontuan hartuta laupabost laguneko taldeak osatuko dira. Euskaraz hitz egiteko konpromisoa hartuta, talde bakoitzak arduradun bat aukeratuko du eta denon artean erabakiko dute noiz, non eta zertarako bildu. Arruntena astean behin taberna batean biltzea da, baina aukera asko daude: kontzertuetara joan, antzezlanak ikusi, ikastaroak egin eta jakina, mendizaleen taldea ere ez da faltako.

*Euskararen Agenda: Durangaldeko euskaldunon beharrei begira berbalagun proiektuan parte hartzen duten edo elkarlanean ari diren eragile desberdinek ahalegina egin dute euskarazko kultur eskaintza zabal eta duina egiteko. Bertan; ikastaroak, txangoak, ikuskizunak, kontzertuak, errezitaldiak, bertso saioak, diaporamak, eztabaida foroak, hitzaldiak, erakusketak. Agendan hilero Durangaldean euskaraz antolatzen diren ekintzen berri ematen da eta informazioa berbalagunei zein euskaltegietako ikasleei helerazten zaie(e-postaz, zuzenean,..).

Horretaz gain, Durangaldeko berbalagun bloga daukagu; argazkiak, azken berriak eta partaideen iritziak zabaltzeko, hauxe da gure helbidea: http://durangaldea.blogspot.com.

Hemendik aurrera Durangaldeko euskaldunon sarea indartuz joango da, euskara ikasten ari direnek berba egiteko aukera gehiago izango dituzte eta euskara kalera aterako dugu. Badakigu lan handia dagoela oraindik egiteko, baina gogotsu ari gara euskararen alde.

Azkenik, sintoma hauek baldin badituzu:

euskaraz ziurtasunik ez eta lotsatzen bazara; euskara jakin bai baina erabili ez; euskara erabili gura baina norekin ez; euskararen gaineko ardura edota ondo jakin eta beste batzuei laguntzeko prest bazaude, erantzuna honako hau da:

egin zaitez Berbalagun!.

Harremanetarako: durangaldea@aek.org edo 639400786